بۇگىن سەمەي قالاسىنىڭ قاراعايلى ىقشام اۋدانىندا 1200 ورىندىق مەكتەپ پايدالانۋعا بەرىلدى، دەپ حابارلايدى Dalanews.kz
«جايلى مەكتەپ» ۇلتتىق جوباسى اياسىندا سالىنعان №51 ءبىلىم ورداسىنىڭ اشىلۋ سالتاناتىنا وبلىس اكىمى بەرىك ءۋالي، «سامۇرىق قازىنا كونستراكشن» اق باسقارما ءتوراعاسى ماۋلەن ايمانبەتوۆ، ءبىلىم سالاسىنىڭ ارداگەرلەرى، اقساقالدار جانە اتا-انالار قاتىستى.
جاڭا دا جايلى مەكتەپتە وقۋشىلاردىڭ جان-جاقتى ءبىلىم الۋىنا بارلىق جاعداي جاسالعان. زاماناۋي جابدىقتارمەن تولىق قامتاماسىز ەتىلگەن ءبىلىم ورداسىندا 65 سىنىپ-كومپلەكت بار. ونىڭ ىشىندە ەكى مەكتەپالدى دايارلىق سىنىبى جۇمىس ىستەيدى. مەكتەپتە 100-گە جۋىق پەداگوگ ەڭبەك ەتەدى.
جاڭا مەكتەپ 33 وقۋ كابينەتىمەن قاتار، ءۇش ينفورماتيكا كابينەتى، روبوتوتەحنيكا سىنىبى، STEM زەرتحاناسى، گرافيكا جانە مودەلدەۋ، مۋلتيمەديا، ۆيزۋالدى ونەر پاندىك كابينەتتەرىمەن جابدىقتالعان. سونداي-اق «ءۇي مادەنيەتى» مەن «تاماقتانۋ مادەنيەتى» شەبەرحانالارى قاراستىرىلعان. 250 ورىندىق اكت زالى، 338 ورىندىق اسحانا، رەسۋرستىق ورتالىق پەن كىتاپحانا، ەكى سپورت زالى، ەكى فۋتبول الاڭى وقۋشىلاردىڭ شىعارماشىلىق، ينتەللەكتۋالدىق، سپورتتىق تۇرعىدان دامۋىنا مۇمكىندىك بەرەدى.
ايماق باسشىسى جاڭا مەكتەپتىڭ اشىلۋ سالتاناتىندا سويلەگەن قۇتتىقتاۋ سوزىندە ءبىلىم ورداسىنىڭ قاراعايلى ىقشام اۋدانى ءۇشىن عانا ەمەس، قالا تۇرعىندارى ءۇشىن ماڭىزى زور ەكەنىن اتاپ ءوتتى.
«وزدەرىڭىز جاقسى بىلەسىزدەر، مەملەكەت باسشىسى ءوز جولداۋىندا «ءاربىر وقۋشىنىڭ ءبىلىم الىپ، جان-جاقتى دامۋى ءۇشىن قولايلى جاعداي جاسالۋعا ءتيىس» دەپ «جايلى مەكتەپ» ۇلتتىق جوباسىن جۇزەگە اسىرۋدى تاپسىرعان بولاتىن. بۇگىن، مىنە، وسى جوبا اياسىندا اباي وبلىسىنداعى العاشقى مەكتەپتى پايدالانۋعا بەرىپ جاتىرمىز. وقۋشىلار مەن اتا-انالار بۇل كۇندى اسىعا كۇتتى. ءبىز دە اكىمدىك تاراپىنان مەكتەپتەردىڭ تەزىرەك، ءتورتىنشى توقساندا پايدالانۋعا بەرىلۋىنە كۇش سالدىق. بۇعان دەيىن قالانىڭ باسقا مەكتەپتەرىنە قاتىناپ وقىعان وقۋشىلارعا تاماشا تارتۋ جاسادىق دەپ ويلايمىن. ءبىلىم ورداسىنىڭ بارلىق ۇستازدارى مەن وقۋشىلارىنا ۇزدىك جەتىستىكتەر مەن جارقىن بولاشاق تىلەيمىن. جاڭا دا جايلى مەكتەپ قۇتتى بولسىن»،- دەدى وبلىس اكىمى.
ايماق باسشىسى وبلىستا «جايلى مەكتەپ» ۇلتتىق جوباسى اياسىندا 5 مەكتەپ سالۋ جوسپارلانعانىن، بۇگىن بەسقاراعاي اۋدانىندا 300 ورىندىق مەكتەپ اشىلاتىنىن، جاڭا وقۋ جىلىندا سەمەي قالاسى مەن اياگوز قالاسىندا ەكى ءبىلىم ورداسى پايدالانۋعا بەرىلەتىنىن ايتتى.
وبلىس اكىمى اشىلۋ سالتاناتىنان سوڭ قوناقتارمەن بىرگە مەكتەپتىڭ كابينەتتەرى، كىتاپحاناسى، زەرتحانالارىن جانە شەبەرحانالارىن ارالاپ، سپورت زالدارى مەن فۋتبول الاڭىن كوردى. وقۋشىلارمەن، مۇعالىمدەرمەن پىكىرلەسىپ، جاڭا مەكتەپتەگى جاڭا قادامدارىنا ساتتىلىك تىلەدى.
وقۋشىلاردىڭ اتا-انالارى جاڭا ىقشام اۋداننىڭ ەكىنشى مەكتەپپەن تولىققانىنا ريزاشىلىقتارىن جەتكىزدى.
«جاڭا مەكتەپتىڭ سالىنۋى قاراعايلى تۇرعىندارىنىڭ كوپتەن بەرگى ارمانى ەدى. ىقشام اۋداننىڭ اتا-انالارى بالالارىن قالانىڭ تۇكپىر-تۇكپىرىندەگى مەكتەپتەرگە ءتۇرلى كولىكپەن تاسىپ، قينالىپ ءجۇرۋشى ەدى. ويتكەنى، قاراعايلىدا جالعىز عانا مەكتەپ بولدى. بۇگىن وسى ماسەلە شەشىمىن تاۋىپ، قۋانىشقا بولەنىپ وتىرمىز. جاڭا مەكتەپتە وقۋشىلارعا نە كەرەكتىڭ ءبارى بار. بارلىق جاعداي جاسالعان. وسىنداي مەكتەپ سالىپ بەرگەنى ءۇشىن پرەزيدەنتىمىزگە العىس ايتامىز»، - دەدى قاراعايلى ىقشام اۋدانىنىڭ تۇرعىنى باقتىلى قانافينا.
