Abai oblysynda kóktemgi sý tasqynyna bailanysty qaýipsizdik sharalary kúsheitilip, aldyn alý jumystary bastaldy. Osy maqsatta 1 400 adamnan turatyn arnaiy top qurylyp, qajetti tehnika ázirlendi, qorǵanys dambalary salyndy,- dep habarlaidy Dalanews.kz
Sonymen qatar, mamandar ózender men joldardyń, sý qoimalarynyń jaǵdaiyn baqylap, sý basý qaýpin azaitý úshin injenerlik jumystar júrgizýde.
Bul týraly óńirlik kommýnikatsiialar qyzmetinde ótken baspasóz jiynynda Abai oblysy Tótenshe jaǵdailar departamenti bastyǵynyń orynbasary Aleksei Shtykel málimdedi.
"Oblysta sý tasqyny naýryzdyń ekinshi onkúndiginde bastalyp, maýsymnyń ortasyna deiin jalǵasady. «Qazgidromet» málimetteri boiynsha, topyraqtyń qatý deńgeii 22-115 santimetr aralyǵynda, bul ótken jylmen salystyrǵanda tómen. Sinoptikterdiń boljamyna sáikes, naýryz aiyndaǵy ortasha temperatýra klimattyq normadan 2 gradýsqa joǵary bolady. Ǵaryshtyq monitoring derekteri boiynsha, oblystyń basym bóligi qarmen jabylǵan. Sý tasqyny qaýpi joǵary aimaqtar tizimine 45 eldi meken men 35 jol ýchaskesi engizildi", – dedi Aleksei Shtykel.
Onyń aitýynsha, óńirde tasqynǵa qarsy keshendi jospar júzege asyrylyp jatyr. Barlyq kúshter men quraldar tolyq daiyndyqqa keltirilgen.
"Qazirgi tańda 60-tan astam injenerlik is-shara atqarylyp, ózen jaǵalaýlary bekitildi, 32 qorǵanys dambasy salyndy. Sonymen qatar, 14 avtojol ýchaskesinde sý ótkizý múmkindigi artty. Qańtar aiynda sý tasqynynyń aldyn alý sharalary bekitilip, qala jáne aýdan ákimdikteri 12 myń tonnadan astam inertti material, 74 myń dana qap, 140 tonna janarmai qoryn jasaqtady. Budan bólek, ózenderde muz jarý jumystary júrgizý úshin tiisti kelisimder jasaldy", – dep naqtylady spiker.
Ótken jeksenbide Abai oblysynyń ákimi Berik Ýáli, onyń orynbasary Dimitrii Garikov jáne Aleksei Shtykel óńirdiń birneshe aýdanyn, sonyń ishinde Borodýliha aýmaǵyn áýeden baqylap shyqty. Jumys toby Ertis pen Úbi ózenderiniń gidrologiialyq jaǵdaiyn baǵalap, ahýaldy tekserdi. Aleksei Shtykeldiń aitýynsha, qazirgi kezde jaǵdai turaqty, ózenderde muz qatqan, sý deńgeii kóterilmegen.
Abai oblystyq tabiǵi resýrstar jáne tabiǵat paidalanýdy retteý basqarmasynyń basshysy Ainur Aqmyrza sý qoimalary men toǵandardyń tolymdylyǵyna monitoring júrgizilip jatqanyn jetkizdi.
"Sý ótkizý arnalary men kireberis joldar tazartylyp jatyr. Sondai-aq, kún saiyn sý qoimalarynyń deńgeiin baqylaý úshin 12 kezekshi-baqylaýshy bekitildi. Gidrotehnikalyq nysandar keshendi tekseristen ótti. Búginde barlyq kommýnaldyq sý qoimalary tranzittik rejimde jumys istep, artyq sý jinalmai jatyr", – dep túiindedi Ainur Aqmyrza.
