اباي وبلىسىندا كوكتەمگى سۋ تاسقىنىنا بايلانىستى قاۋىپسىزدىك شارالارى كۇشەيتىلىپ، الدىن الۋ جۇمىستارى باستالدى. وسى ماقساتتا 1 400 ادامنان تۇراتىن ارنايى توپ قۇرىلىپ، قاجەتتى تەحنيكا ازىرلەندى، قورعانىس دامبالارى سالىندى،- دەپ حابارلايدى Dalanews.kz
سونىمەن قاتار، ماماندار وزەندەر مەن جولداردىڭ، سۋ قويمالارىنىڭ جاعدايىن باقىلاپ، سۋ باسۋ ءقاۋپىن ازايتۋ ءۇشىن ينجەنەرلىك جۇمىستار جۇرگىزۋدە.
بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز جيىنىندا اباي وبلىسى توتەنشە جاعدايلار دەپارتامەنتى باستىعىنىڭ ورىنباسارى الەكسەي شتىكەل مالىمدەدى.
"وبلىستا سۋ تاسقىنى ناۋرىزدىڭ ەكىنشى ونكۇندىگىندە باستالىپ، ماۋسىمنىڭ ورتاسىنا دەيىن جالعاسادى. «قازگيدرومەت» مالىمەتتەرى بويىنشا، توپىراقتىڭ قاتۋ دەڭگەيى 22-115 سانتيمەتر ارالىعىندا، بۇل وتكەن جىلمەن سالىستىرعاندا تومەن. سينوپتيكتەردىڭ بولجامىنا سايكەس، ناۋرىز ايىنداعى ورتاشا تەمپەراتۋرا كليماتتىق نورمادان 2 گرادۋسقا جوعارى بولادى. عارىشتىق مونيتورينگ دەرەكتەرى بويىنشا، وبلىستىڭ باسىم بولىگى قارمەن جابىلعان. سۋ تاسقىنى ءقاۋپى جوعارى ايماقتار تىزىمىنە 45 ەلدى مەكەن مەن 35 جول ۋچاسكەسى ەنگىزىلدى"، – دەدى الەكسەي شتىكەل.
ونىڭ ايتۋىنشا، وڭىردە تاسقىنعا قارسى كەشەندى جوسپار جۇزەگە اسىرىلىپ جاتىر. بارلىق كۇشتەر مەن قۇرالدار تولىق دايىندىققا كەلتىرىلگەن.
"قازىرگى تاڭدا 60-تان استام ينجەنەرلىك ءىس-شارا اتقارىلىپ، وزەن جاعالاۋلارى بەكىتىلدى، 32 قورعانىس دامباسى سالىندى. سونىمەن قاتار، 14 اۆتوجول ۋچاسكەسىندە سۋ وتكىزۋ مۇمكىندىگى ارتتى. قاڭتار ايىندا سۋ تاسقىنىنىڭ الدىن الۋ شارالارى بەكىتىلىپ، قالا جانە اۋدان اكىمدىكتەرى 12 مىڭ توننادان استام ينەرتتى ماتەريال، 74 مىڭ دانا قاپ، 140 توننا جانارماي قورىن جاساقتادى. بۇدان بولەك، وزەندەردە مۇز جارۋ جۇمىستارى جۇرگىزۋ ءۇشىن ءتيىستى كەلىسىمدەر جاسالدى"، – دەپ ناقتىلادى سپيكەر.
وتكەن جەكسەنبىدە اباي وبلىسىنىڭ اكىمى بەرىك ءۋالي، ونىڭ ورىنباسارى ديميتريي گاريكوۆ جانە الەكسەي شتىكەل ءوڭىردىڭ بىرنەشە اۋدانىن، سونىڭ ىشىندە بورودۋليحا اۋماعىن اۋەدەن باقىلاپ شىقتى. جۇمىس توبى ەرتىس پەن ءۇبى وزەندەرىنىڭ گيدرولوگيالىق جاعدايىن باعالاپ، احۋالدى تەكسەردى. الەكسەي شتىكەلدىڭ ايتۋىنشا، قازىرگى كەزدە جاعداي تۇراقتى، وزەندەردە مۇز قاتقان، سۋ دەڭگەيى كوتەرىلمەگەن.
اباي وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى اينۇر اقمىرزا سۋ قويمالارى مەن توعانداردىڭ تولىمدىلىعىنا مونيتورينگ جۇرگىزىلىپ جاتقانىن جەتكىزدى.
"سۋ وتكىزۋ ارنالارى مەن كىرەبەرىس جولدار تازارتىلىپ جاتىر. سونداي-اق، كۇن سايىن سۋ قويمالارىنىڭ دەڭگەيىن باقىلاۋ ءۇشىن 12 كەزەكشى-باقىلاۋشى بەكىتىلدى. گيدروتەحنيكالىق نىساندار كەشەندى تەكسەرىستەن ءوتتى. بۇگىندە بارلىق كوممۋنالدىق سۋ قويمالارى ترانزيتتىك رەجيمدە جۇمىس ىستەپ، ارتىق سۋ جينالماي جاتىر"، – دەپ تۇيىندەدى اينۇر اقمىرزا.
