"Elimizdiń ár óńirinde turatyn Semeilikter oblystyń logotipin maquldap, óńirde toi tomalaqtan basqa qandai jumystar atqaryldy?", – dep ara-tura surap qoiady.
Iá áleýmettik jelide osy eki taqyryp qyzý talqylandy desek artyq aitpaǵanymyz bolar. Sodan bolar ózge aimaqtaǵylar Abai oblysynda atqarylyp jatqan basqa jumystardan habarsyz qalǵan siiaqty. Álde aqparat jetpei jatsa kerek.
Maýsym aiynyń 11-i kúni Abai oblysynyń ákimi bolyp Nurlan Uranhaev taǵaiyndaldy. Sońǵy jyldary Astana qalasynda eńbek etken. Elimizdegi bas shahardyń sáýlet, qala qurylysy jáne jer qatynastary basqarmasynyń basshysy bolǵan.
Sodan, Astana kórgen semeilik azamat óńirdiń tynys-tirshiligimen tanysý úshin, oblys ortalyǵyna qarasty aýdandarǵa eski Qazaqstandaǵy ádet boiynsha, keibir basshylar siiaqty tik ushaq pen emes, avtokólikpen baryp, tas joldyń sapasyn baiqap qaitty. Taqtaidai emes, oidym-oidym, shuńqyr-shuńqyr ekenine kóz jetkizdi.
Joldyń nasharlyǵy jaily Abai oblysynyń máslihat hatshysy Qýanysh Súleimenov tiisti orynǵa hat ta joldady.
Jalpy óńirdiń týristik áleýeti joǵary desek, sol demalys aimaqtarǵa baratyn joldyń sapasy syn kótermeitini belgili. Jyl saiyn Semei-Úrjar baǵyty boiynsha tas jol taqtaidai bolady degen aqpar jeldei eskenmen, is júzinde ázirge oryndalmas arman bolyp tur.
Mine jylda Alakólge baryp dem alatyn millionǵa jýyq demalýshylar men jergilikti turǵyndardyń sapaly tas jolmen júrýine jaǵdai týǵyzý endi óńir basshysy aldyndaǵy basty mindetter bolmaq. Al Semei qalasyndaǵy joldardyń máselesi de ózekti ekeni belgili.
Kezinde Hakim Abai, Qanysh, Ábekei Sátpaevtar turǵan shahardyń eski hám tarihi Tat krai atalatyn shaǵyn aýdandardyń shirek ǵasyr jóndelmegen joldaryna asfalt tóselip, jergilikti turǵyndar «oblys bolǵanymyz qandai jaqsy boldy» dep qýanyshtaryn bildirýde.
Jasyratyny joq, Semeide otbasymen demalyp serýendeitin saiabaqtar az. Shahardaǵy 1 milliard teńgeden astam qarjy ketip, kúrdeli jóndeý jumystary júrgizilgen jalǵyz ortalyq parktiń ózi kóńil qýantarlyq jaǵdaida emes.
Sodan bolar Nurlan Telmanulynyń bastamasymen Semeide jańa qoǵamdyq demalys orny paida boldy. Aspaly kópir astynda ashylǵan demalys ornynda skeit park, parkýr jáne vorkaýt, fitnes aimaq jáne balalar oiyn alańdary bar. Bul qala turǵyndary úshin úlken syi boldy. Jáne shahardyń basqa shaǵyn aýdandarynda da jańa demalys aimaqtary paida bolmaq. Sonymen qatar qalada hokkeige arnalǵan muz aidyny iske qosylmaq.
1961 jyly salynǵan Semeidegi eski kópirdiń sapasy jaily jyl saiyn aitylyp, apatty jaǵdaidaǵy nysanǵa jyl saiyn ortasha jóndeý jumystary júrip keldi. 2022 jyldan bastap Uzyndyǵy 810 metr bolatyn tórt jolaqtan turatyn jańa kópirdiń qurylysy bastaldy. Joba 2025 jyly aiaqtalýy tiis. Kópir qurylysynan bólek Abai oblysyn damytýdyń aldaǵy 5 jylǵa arnalǵan keshendi jospary jasaldy.
Osy joba negizinde Alash qalasy atanǵan Semeidiń sol jaǵalaýynda tirshilik qyza túspek. Aldaǵy ýaqytta Jambyl kóshesinen «Pishevik» stadionyna deiin jaǵalaý salý josparlanǵan.
Jobalardyń qatarynda kongress holl, jańa Oqýshylar saraiy, Muz saraiy, oblystyq aýrýhana, juqpaly aýrýlar aýrýhanasy jáne Prezidenttiń tapsyrmasyna sáikes jylý elektr ortalyǵy salynbaq. Sondai-aq oblysqa qarasty aýdan jáne aýyldyq eldi mekenderde mektepter, balabaqshalar, infraqurylym, emhanalar qurylystary iske aspaq.
Bir kezderi Qazaq aiaq dobynyń otany Semei qalasynda sol kezde otyzda orda buzǵan qazirgi oblys ákimi Nurlan Uranhaevtyń iskerligi, Ǵalymjan Jaqiianovtai basshynyń arqasynda «Elimai» fýtbol komandasy elimizdiń úsh dúrkin jeńimpazy atanǵany kópshiliktiń esinde bolar.
Alaida qala oblys mártebesinen aiyrylǵannan keiin, shahardyń damýy men qatar fýtbolda qurdymǵa ketti. Biyl 25 jyldan keiin jeke oblys bolǵan Semei shaharynda ańyzǵa ainalǵan «Elimai» fýtbol komandasy qaita qurylyp, jańǵyrý dáýirin basynan ótkerip, 2023 jyldan bastap birinshi ligada óner kórsetýge múmkindik aldy.
Iá, Semei shaharymen qatar, Abai oblysyna qarasty aýdandardyń da infraqurylymy men tynys-tirshiligine jiti kóńil bólinýi kerek. Aýyldar men eldi mekenderde ǵalamtor máselesi ózekti ekeni belgili. 40 jyl iadrolyq qarýdyń ziianyn tartyp, qiyn kezderdi basynan ótkergen Abyraly óńirindegi Qainar aýylyndaǵy aýrýhanada dáriger jetispeýshiligi jyldar boiy aitylýda.
Aiagóz ben buryńǵy Shubartaý aýdanynyń ortalyǵy- Barshatastyń arasyndaǵy tas joldyń syn kótermeitini jyldar boiy aitylyp kele jatsa da, sheshimin áli tappady. Sol siiaqty Semei-Kókpekti-Aqsýat baǵytyndaǵy jolda, kólik ielerin ábigerge salǵany qashan.
Iá atqarylar sharýa barshylyq. Kók pen emes, shań jol men júrgen Nurlan Telmanuly Abai oblysyna bir ózgeris ákeler.
Demek jurt aityp júrgendei tek toi toilap, logotipterdi talqylaý men emes, turǵyndarǵa qajetti barlyq salany qamtityn qyrýar jumystardyń basy bastalǵanyn naqty isterden kóre alýdamyz.
Avtor: Qýanysh Rahmetollauly
