Abaı oblysynda muǵalimder kúnine oraı aımaq basshysy Nurlan Uranhaev, oblystyq máslıhat tóraǵasy Qýanysh Súleımenov ardager ustazdardyń úılerine baryp, uzaq jylǵy qajyrly eńbekteri úshin alǵys bildirdi.
Sanaly ǵumyrlaryn jas urpaqty tárbıeleý men bilim berýge arnaǵan qarıalarǵa Alǵys hattar men estelik syılyqtar tabystaldy.
Arager ustaz Aleksandra Volkova 1 ǵasyrdyń kýási. Qazaqstanǵa Uly Otan soǵysy aıaqtalǵannan keıin kelip, 1953 jyldan Semıar orta mektebinde bastaýysh synyptarǵa sabaq berdi. 30 jyldyq muǵalimdik jolynda zeınetke shyqqanǵa deıin birneshe býyn urpaqty tárbıeledi.
-Jasym júzden asty. Osy kúnge jetýimniń syry balalardy, shákirtterimdi jaqsy kórýimnen dep oılaımyn. Eńbegimniń esh ketpegenine qýanamyn. Elep-eskerip kelgenderińizge analyq, ustazdyq alǵysymdy bildiremin, - dedi Aleksandra Volkova.
Marvatjan Baıqanov aqsaqal óziniń eńbek jolyn 1950 jyly Bashkól mektebinde qazaq tili men ádebıeti pániniń oqytýshysy bolyp bastaǵan. Uzaq jyldar bilim bólimin basqaryp, 39 jyldyq eńbek ótilimen qurmetti demalysqa shyqqan. Eńbek ári tyl eńbekkeri Marvatjan Adhamuly qazir Besqaraǵaı aýdanyndaǵy "Bashkól" tatar mádenı ortalyǵynyń aqsaqaldar keńesin basqarady.
Elimizdiń bilimdi jastaryn tárbıelep, eńbeginiń zeınetin kórip otyrǵan qarıalar búgingi merekede laıyqty qurmetke ıe boldy.
