Búgin oblys ákimi Berik Ýálidiń tóraǵalyǵymen keńeitilgen apparattyq keńes ótti. Jiynda 2025-2026 jyldardaǵy jylý maýsymyna daiyndyq barysy qaraldy,- dep habarlaidy Dalanews.kz
Keńeske oblystyq basqarma basshylary, óńirlik departament jetekshileri, al aýdan jáne qala ákimderi beinerejimde qatysty.
Jiynda aldaǵy jylý maýsymyna daiyndyq jáne qazirgi ýaqytta júrgizilip jatqan jumystar týraly Energetika jáne turǵyn úi-kommýnaldyq sharýashylyq basqarmasynyń basshysy Radjan Seiitqanov, Semei qalasy ákiminiń mindetin atqarýshy Bekjan Bapyshev, Aiagóz aýdanynyń ákimi Daniiar Shákárimov, Jarma aýdanynyń ákimi Nurlan Borsyqbaev baiandady.
Biylǵy 27 mamyrda Premer-Ministr Oljas Bektenovtiń tóraǵalyǵymen ótken Úkimet otyrysynda jylytý máselesi talqylanyp, 10 maýsymǵa deiin jylytý maýsymyna daiyndyq josparyn ózektendirýdi tapsyrǵan bolatyn. Bul tapsyrma Energetika jáne turǵyn úi-kommýnaldyq sharýashylyq basqarmasy, Semei qalasy, Aiagóz jáne Jarma aýdandarynda tiisti deńgeide oryndalmaǵan. Aimaq basshysy oblys ákiminiń apparatyna tapsyrmany tolyq oryndamaǵan basqarma basshysynyń sol kezdegi mindetin atqarýshy men aýdan, qala ákimderiniń osy salaǵa jaýapty orynbasarlarynyń jaýapkershiligin qaraý boiynsha usynys engizýdi tapsyrdy.
Oblysta ortalyqtandyrylǵan jylýmen qamtamasyz etetin 46 jylý qazandyǵy bar. Biyl barlyq qarjy kózderinen bólingen 6,6 mlrd teńgege 12 jylý qazandyǵyn jóndeý, 11,2 shaqyrym jylý jelisin jańartý jumystary júrgizilýde. Qazir Semeide alty ýchastokta magistraldyq, ishki kvartaldyq jylý jelileri aýystyrylyp jatyr.
Aiagóz qalasynda 7 jylý kózine biriktirilgen 29 qazandyq jumys isteidi. Aýdan ortalyǵy turǵyndarynyń 60 paiyzdan astamyn jylýmen qamtamasyz etetin «Ortalyq» qazandyǵyna kúrdeli jóndeý júrgizý úshin joba daiyndalǵan. Oǵan sáikes qazandyqtyń qýattylyǵyn 13,2 Gkal-dan 30 Gkal-ǵa deiin arttyrý kózdelgen. Sondai-aq Aiagózdegi 10,4 shaqyrym jylý jelilerin jóndeý úshin jobalyq smetalyq qujattama ázirlengen.
Jarma aýdany Shýaq aýylyndaǵy ortalyqtandyrylǵan jylý júiesinde 3 qazandyq bar. Qazirgi tańda 2-inshi qazandyqty jóndeý qajettigi týyndap otyr. Aýylda 5,2 shaqyrym jylý jelisi bar. Onyń paiyzy 68 paiyzy tozǵan. Biyl 3 shaqyrym jelini kúrdeli jóndeýge oblystyq biýdjetten qarjy bólindi.
Óńirdiń kómirge qajettiligi 1,2 mln tonnany quraidy. Oblys boiynsha 16 kómir satý orny jáne 32 kómir operatory jumys isteidi.
Keńeste aimaq basshysy jylý qazandyqtary men jylý jelilerindegi jóndeý jumystaryn kesteden keshiktirmeýdi, aýdan, qala ákimderine jańa jylytý maýsymyna josparlanǵan jóndeý jumystaryn 15 qyrkúiekke deiin aiaqtaýdy tapsyrdy. Aiagóz jáne Jarma aýdandarynyń ákimderine Aiagóz qalasy men Shýaq kentindegi qazandyqtardyń jaǵdaiyn, júrgizilgen jumystardyń sapaly bolýyn únemi baqylaýda ustaý qajettigin aitty. Salaǵa jaýapty orynbasary Serik Tólenbergenov pen Energetika jáne turǵyn úi-kommýnaldyq sharýashylyq basqarmasynyń basshysy Radjan Seiitqanovqa tapsyrmalardyń ýaqtyly jáne sapaly atqarylýyn qatań qadaǵalaýǵa alýdy júktedi.
«Jylytý maýsymyna 100 paiyz daiyn bolý asa mańyzdy jáne bul jumystarǵa aýdan, qala ákimderi tikelei jaýapty ekenin eskertemin. Jylý máselesin Úkimet basshysy tikelei qadaǵalap otyr. «Qystyń qamyn jaz oila» deidi. Aldaǵy úsh aida jumystyń barlyǵyn tolyq atqaryp, bólingen qarjyny igerip, jumysty sapaly oryndaýymyz kerek»,- dedi oblys ákimi.
Aimaq basshysy salaǵa jaýapty orynbasaryna atqarylyp jatqan jumystar týraly apta saiyn baiandap otyrýdy, oblys ákiminiń apparatyna jylytý maýsymyna daiyndyq barysy boiynsha aiyna bir ret jinalys ótkizýdi jumys kestesine engizýdi tapsyrdy.
