بۇگىن وبلىس اكىمى بەرىك ءۋاليدىڭ توراعالىعىمەن كەڭەيتىلگەن اپپاراتتىق كەڭەس ءوتتى. جيىندا 2025-2026 جىلدارداعى جىلۋ ماۋسىمىنا دايىندىق بارىسى قارالدى،- دەپ حابارلايدى Dalanews.kz
كەڭەسكە وبلىستىق باسقارما باسشىلارى، وڭىرلىك دەپارتامەنت جەتەكشىلەرى، ال اۋدان جانە قالا اكىمدەرى بەينەرەجيمدە قاتىستى.
جيىندا الداعى جىلۋ ماۋسىمىنا دايىندىق جانە قازىرگى ۋاقىتتا جۇرگىزىلىپ جاتقان جۇمىستار تۋرالى ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى رادجان سەيىتقانوۆ، سەمەي قالاسى اكىمىنىڭ مىندەتىن اتقارۋشى بەكجان باپىشيەۆ، اياگوز اۋدانىنىڭ اكىمى دانيار شاكارىموۆ، جارما اۋدانىنىڭ اكىمى نۇرلان بورسىقبايەۆ باياندادى.
بيىلعى 27 مامىردا پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جىلىتۋ ماسەلەسى تالقىلانىپ، 10 ماۋسىمعا دەيىن جىلىتۋ ماۋسىمىنا دايىندىق جوسپارىن وزەكتەندىرۋدى تاپسىرعان بولاتىن. بۇل تاپسىرما ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى، سەمەي قالاسى، اياگوز جانە جارما اۋداندارىندا ءتيىستى دەڭگەيدە ورىندالماعان. ايماق باسشىسى وبلىس اكىمىنىڭ اپپاراتىنا تاپسىرمانى تولىق ورىنداماعان باسقارما باسشىسىنىڭ سول كەزدەگى مىندەتىن اتقارۋشى مەن اۋدان، قالا اكىمدەرىنىڭ وسى سالاعا جاۋاپتى ورىنباسارلارىنىڭ جاۋاپكەرشىلىگىن قاراۋ بويىنشا ۇسىنىس ەنگىزۋدى تاپسىردى.
وبلىستا ورتالىقتاندىرىلعان جىلۋمەن قامتاماسىز ەتەتىن 46 جىلۋ قازاندىعى بار. بيىل بارلىق قارجى كوزدەرىنەن بولىنگەن 6،6 ملرد تەڭگەگە 12 جىلۋ قازاندىعىن جوندەۋ، 11،2 شاقىرىم جىلۋ جەلىسىن جاڭارتۋ جۇمىستارى جۇرگىزىلۋدە. ءقازىر سەمەيدە التى ۋچاستوكتا ماگيسترالدىق، ىشكى كۆارتالدىق جىلۋ جەلىلەرى اۋىستىرىلىپ جاتىر.
اياگوز قالاسىندا 7 جىلۋ كوزىنە بىرىكتىرىلگەن 29 قازاندىق جۇمىس ىستەيدى. اۋدان ورتالىعى تۇرعىندارىنىڭ 60 پايىزدان استامىن جىلۋمەن قامتاماسىز ەتەتىن «ورتالىق» قازاندىعىنا كۇردەلى جوندەۋ جۇرگىزۋ ءۇشىن جوبا دايىندالعان. وعان سايكەس قازاندىقتىڭ قۋاتتىلىعىن 13،2 گكال-دان 30 گكال-عا دەيىن ارتتىرۋ كوزدەلگەن. سونداي-اق اياگوزدەگى 10،4 شاقىرىم جىلۋ جەلىلەرىن جوندەۋ ءۇشىن جوبالىق سمەتالىق قۇجاتتاما ازىرلەنگەن.
جارما اۋدانى شۋاق اۋىلىنداعى ورتالىقتاندىرىلعان جىلۋ جۇيەسىندە 3 قازاندىق بار. قازىرگى تاڭدا 2ء-ىنشى قازاندىقتى جوندەۋ قاجەتتىگى تۋىنداپ وتىر. اۋىلدا 5،2 شاقىرىم جىلۋ جەلىسى بار. ونىڭ پايىزى 68 پايىزى توزعان. بيىل 3 شاقىرىم جەلىنى كۇردەلى جوندەۋگە وبلىستىق بيۋدجەتتەن قارجى ءبولىندى.
ءوڭىردىڭ كومىرگە قاجەتتىلىگى 1،2 ملن توننانى قۇرايدى. وبلىس بويىنشا 16 كومىر ساتۋ ورنى جانە 32 كومىر وپەراتورى جۇمىس ىستەيدى.
كەڭەستە ايماق باسشىسى جىلۋ قازاندىقتارى مەن جىلۋ جەلىلەرىندەگى جوندەۋ جۇمىستارىن كەستەدەن كەشىكتىرمەۋدى، اۋدان، قالا اكىمدەرىنە جاڭا جىلىتۋ ماۋسىمىنا جوسپارلانعان جوندەۋ جۇمىستارىن 15 قىركۇيەككە دەيىن اياقتاۋدى تاپسىردى. اياگوز جانە جارما اۋداندارىنىڭ اكىمدەرىنە اياگوز قالاسى مەن شۋاق كەنتىندەگى قازاندىقتاردىڭ جاعدايىن، جۇرگىزىلگەن جۇمىستاردىڭ ساپالى بولۋىن ۇنەمى باقىلاۋدا ۇستاۋ قاجەتتىگىن ايتتى. سالاعا جاۋاپتى ورىنباسارى سەرىك تولەنبەرگەنوۆ پەن ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى رادجان سەيىتقانوۆقا تاپسىرمالاردىڭ ۋاقتىلى جانە ساپالى اتقارىلۋىن قاتاڭ قاداعالاۋعا الۋدى جۇكتەدى.
«جىلىتۋ ماۋسىمىنا 100 پايىز دايىن بولۋ اسا ماڭىزدى جانە بۇل جۇمىستارعا اۋدان، قالا اكىمدەرى تىكەلەي جاۋاپتى ەكەنىن ەسكەرتەمىن. جىلۋ ماسەلەسىن ۇكىمەت باسشىسى تىكەلەي قاداعالاپ وتىر. «قىستىڭ قامىن جاز ويلا» دەيدى. الداعى ءۇش ايدا جۇمىستىڭ بارلىعىن تولىق اتقارىپ، بولىنگەن قارجىنى يگەرىپ، جۇمىستى ساپالى ورىنداۋىمىز كەرەك»،- دەدى وبلىس اكىمى.
ايماق باسشىسى سالاعا جاۋاپتى ورىنباسارىنا اتقارىلىپ جاتقان جۇمىستار تۋرالى اپتا سايىن بايانداپ وتىرۋدى، وبلىس اكىمىنىڭ اپپاراتىنا جىلىتۋ ماۋسىمىنا دايىندىق بارىسى بويىنشا ايىنا ءبىر رەت جينالىس وتكىزۋدى جۇمىس كەستەسىنە ەنگىزۋدى تاپسىردى.
