Búginde Abaı oblysy men Qytaı arasyndaǵy yntymaqtastyq belsendi túrde damyp keledi. 2023 jyldyń toǵyz aıynda taýar aınalymynyń jalpy kólemi 250 mln dollardy quraǵan. Mundaǵy eksporttyń kólemi 169,6 mln dollar bolsa, ımporttyń úlesi 80,4 mln dollarǵa jetken.
Abaı oblysynyń ákimi óz sózinde Qytaımen strategıalyq áriptestikti odan ári damytýdyń mańyzdylyǵyn atap ótti.
– Qytaı Halyq Respýblıkasy – oblysymyzdyń negizgi syrtqy saýda-ekonomıkalyq seriktesteriniń biri. Eki el arasynda aýyl sharýashylyǵynda, jasyl energetıkada, týrızm salasy men elektrondyq saýdada ózara is-qımyl áleýeti zor ekeni sózsiz, – dedi oblys ákimi Nurlan Uranhaev.
Sondaı-aq, aımaqta logıstıkalyq ortalyqtyń qurylysy bastaldy. Sıan qalasynda eki el arasyndaǵy júk aınalymyn arttyrýǵa jáne Qazaqstan arasyndaǵy strategıalyq seriktestikti nyǵaıtýǵa kómektesetin qurǵaq port qurylysy josparlanǵan.
– Elimizdiń Prezıdentiniń bastamasymen «Bahty» ótkelinde jańa «qurǵaq port» salý josparlanyp otyr. Jobanyń tolyq iske qosylýy eki eldiń yntymaqtastyǵyna jáne kólik-logıstıka ınfraqurylymyn damytýǵa tyń serpin beredi. Bizdiń basty aımaqtyq mindetimiz, Memleket basshylarynyń ýaǵdalastyqtaryn tolyq iske asyrý jóninde keshendi sharalar qabyldaý. Óz tarapymyzdan atalǵan jobalarǵa barynsha qoldaý kórsetetin bolamyz, – dedi oblys basshysy Nurlan Uranhaev.
Aıta ketsek, Abaı oblysy Qytaı halyq respýblıkasynan Reseı Federasıasyna jáne ortalyq Azıa elderine tranzıttik júk tasymaldaý arqyly tutastaı ekonomıkanyń damýyna serpin beretin biregeı tranzıttik áleýetke ıe.
Jıyn barysynda yntymaqtastyq jáne jobany júzege asyrý týraly memorandýmǵa da qol qoıyldy. Yntymaqtastyqtyń negizgi baǵyty aýyl sharýashylyǵy, energetıka, týrızmdi damytý, saýda-ekonomıkalyq qarym-qatynastar, transshekaralyq kólik shekaralaryn keńeıtý, elektrondy komersıany damytý, kólik ınfraqurylymyn jaqsartý bolyp tabylady.
