Qazaqstan Ǵalymdary Odaǵynyń Prezidenti, QR UIA akademigi, ekonomika ǵylymdarynyń doktory, professor Orazaly Sábden ál-Farabi atyndaǵy QazUÝ-dyń saiasattaný jáne saiasi tehnologiialar kafedrasynyń stýdentterine «Abai jáne qazaq bolashaǵy» atty dáris oqydy. Ataqty qoǵam qairatkeri óziniń dárisinde uly dala oishyly Abai Qunanbaiulynyń qazaq halqynyń ómirindegi róli jáne aqyn shyǵarmalary men aitqan ósietteriniń mańyzyna toqtaldy.
«Óz zamanynda Abai erkindik pen quqyq, adamgershilik taqyryptary men tarihi máselelerdi kóterdi. Onyń urpaqtaryna qaldyrǵan mol murasy búgingi tańda da óz mańyzdylyǵyn joiǵan joq», – dedi Orazaly Sábden. Mártebeli qonaq Muhtar Áýezovtiń «Abai sózi – halyq sózi» degen pikirimen kelise otyryp, qazaq jastarynyń Abaidyń bai pálsapasyn ary qarai damyta túsý kerektigin aitty.
Orazaly Sábden Abai pálsapasyn bolashaqta memleket saiasatynda jáne qoǵamdyq ómirde paidalanýdyń mańyzdylyǵyna da toqtaldy.
Avtorlyq kitabyn taldai otyryp, Orazaly Sábden ótken kún men bolashaqtyń ózara bailanysynyń erekshe ekenin aityp, ol álemde ne bolyp jatyr, biz kim boldyq, qazir kimbiz jáne bolashaqta bizdi ne kútip tur, ishki saiasatta bolyp jatqan máseleler men rýhani qundylyqtardy qaita jańǵyrtý siiaqty birqatar mańyzdy taqyryptardy órbitti. Stýdentter Orazaly Sábdenge alǵystaryn aityp, kezdesýdiń qazaq qoǵamynyń damýyndaǵy mańyzdylyǵyn atap ótti.
«QmD» aqparat
