EKSPO aiaqtaldy. Abyroimen ótkizgen, abyroimen shyǵaryp salǵan siiaqtymyz. «Bolashaqtyń energiiasy» taqyrybyndaǵy kórme úsh ai nemese 93 kún, nemese 2232 saǵatqa sozyldy.
Esterińizde me?
EKSPO bastalardyń aldynda Esimov «kórmege 2 mln-ǵa tarta adam keledi» degen. «Aryq aityp, semiz shyǵypty» Esimov.
EKSPO kórmesine kelýshilerdiń sany aldyn-ala boljanǵan kólemnen eki ese artyq bolypty.
«Kelýshilerdiń jalpy sany 3 977 545 adam boldy, aldyn ala boljam boiynsha bul kórsetkish 2 million qonaq bolady dep belgilengen edi», – deidi «Astana EKSPO-2017» AQ baspasóz qyzmeti.
Qazir ne istelýde?
«Ǵimaratty uiymdastyrýshylarǵa bastapqy qalpynda tapsyrý maqsatynda, qatysýshylar ózderiniń eksponattaryn alyp, ishki qurylys konstrýktsiialaryn qalpyna keltirip, qoqystardy shyǵaryp, jóndeý jumystaryn júrgizedi», — dedi bizdiń basylymǵa bergen málimetinde kórmeniń baspasóz qyzmeti.
Atalǵan jumystar aiaqtalǵan soń, Ortalyq pavilon –"Nur Álem" sferasy – murajai retinde jumys jasaidy. Keiinnen EKSPO territoriiasynda Halyqaralyq qarjy ortalyǵy ornalasady.
Aitpaqshy umytyp baramyz: EKSPO-2017 kórmesiniń eń tanymal ortalyǵy «Nur Álem» pavilony boldy. Aiaqtalǵanyna deiin buǵan 1 mln 300 myń adam kelgen.
Nazarbaev ne dedi?
Prezidenttiń aitýynsha, EKSPO kórmesine jumsalǵan qarajat kelýshiler men Astanaǵa kelgen týrister esebinen qaitqan.
«Budan buryn aityp ótkenimdei, Astananyń búkil qonaq úileri lyq toldy, búkil meiramhanalar, kontsert zaldary, dúkenderi jaqsy qarqyn aldy. Osy jyldar ishinde Astananyń biýdjetine túsetin túsim birneshe ese artty. Biznesmender de óz qarajatyn tapty. Munyń bári – memleket qazynasyna», — dedi memleket basshysy.
Nazarbaev eske sala ketkendei, 1400 qazaqstandyq kompaniia qurylysqa at salysqan.
«Metall, qurylǵylar, qurylys materialdaryn jetkizdi. Mýltiplikativtik áser osy kásiporyndar arqyly jasaldy. Adamdar aqsha tapty. Biýdjetke de qarajat tústi. EKSPO kórmesine kelýshilerge salynǵan 1400 páter baspanaǵa muqtaj Qazaqstan azamattaryna, astanalyqtarǵa satylady», — dedi bul rette Prezident.
Astanadan keiin...
Iá, muny da aitý kerek shyǵar. Astanadan keiin EKSPO Dýbaida ótedi. 2020 jyly. Aldyn ala baǵalaý boiynsha, onyń ótkizilýine orai infraqurylymǵa qajetti qarajat segiz milliard dollardy quraidy.
Bul kórmege shamamen 25 million adam jinalady dep kútilýde. Álemdik qaýymdastyqtyń innovatsiialyq jáne tehnologiialyq áleýetin tanystyrý "Aqyldy biriktirý, bolashaqty qurý" urany aiasynda alty ai kóleminde ótkiziledi.
