ەكسپو اياقتالدى. ابىرويمەن وتكىزگەن، ابىرويمەن شىعارىپ سالعان سياقتىمىز. «بولاشاقتىڭ ەنەرگياسى» تاقىرىبىنداعى كورمە ءۇش اي نەمەسە 93 كۇن، نەمەسە 2232 ساعاتقا سوزىلدى.
ەستەرىڭىزدە مە؟
ەكسپو باستالاردىڭ الدىندا ەسىموۆ «كورمەگە 2 ملن-عا تارتا ادام كەلەدى» دەگەن. «ارىق ايتىپ، سەمىز شىعىپتى» ەسىموۆ.
ەكسپو كورمەسىنە كەلۋشىلەردىڭ سانى الدىن-الا بولجانعان كولەمنەن ەكى ەسە ارتىق بولىپتى.
«كەلۋشىلەردىڭ جالپى سانى 3 977 545 ادام بولدى، الدىن الا بولجام بويىنشا بۇل كورسەتكىش 2 ميلليون قوناق بولادى دەپ بەلگىلەنگەن ەدى»، – دەيدى «استانا ەكسپو-2017» اق باسپا ءسوز قىزمەتى.
ءقازىر نە ىستەلۋدە؟
ءازىر حالىقارالىق مامانداندىرىلعان ەكسپو-2017 كورمەسىنىڭ تەرريتورياسىندا حالىقارالىق پاۆيلونداردى بولشەكتەۋ جۇمىستارى جۇرگىزىلىپ جاتىر. بۇل جۇمىس 15 جەلتوقسانعا دەيىن جالعاسپاق.
«عيماراتتى ۇيىمداستىرۋشىلارعا باستاپقى قالپىندا تاپسىرۋ ماقساتىندا، قاتىسۋشىلار وزدەرىنىڭ ەكسپوناتتارىن الىپ، ىشكى قۇرىلىس كونسترۋكسيالارىن قالپىنا كەلتىرىپ، قوقىستاردى شىعارىپ، جوندەۋ جۇمىستارىن جۇرگىزەدى»، — دەدى ءبىزدىڭ باسىلىمعا بەرگەن مالىمەتىندە كورمەنىڭ باسپا ءسوز قىزمەتى.
اتالعان جۇمىستار اياقتالعان سوڭ، ورتالىق پاۆيلون –"نۇر الەم" سفەراسى – مۇراجاي رەتىندە جۇمىس جاسايدى. كەيىننەن ەكسپو تەرريتورياسىندا حالىقارالىق قارجى ورتالىعى ورنالاسادى.
ايتپاقشى ۇمىتىپ بارامىز: ەكسپو-2017 كورمەسىنىڭ ەڭ تانىمال ورتالىعى «نۇر الەم» پاۆيلونى بولدى. اياقتالعانىنا دەيىن بۇعان 1 ملن 300 مىڭ ادام كەلگەن.
نازاربايەۆ نە دەدى؟
پرەزيدەنتتىڭ ايتۋىنشا، ەكسپو كورمەسىنە جۇمسالعان قاراجات كەلۋشىلەر مەن استاناعا كەلگەن تۋريستەر ەسەبىنەن قايتقان.
«بۇدان بۇرىن ايتىپ وتكەنىمدەي، استانانىڭ بۇكىل قوناق ۇيلەرى لىق تولدى، بۇكىل مەيرامحانالار، كونسەرت زالدارى، دۇكەندەرى جاقسى قارقىن الدى. وسى جىلدار ىشىندە استانانىڭ بيۋدجەتىنە تۇسەتىن ءتۇسىم بىرنەشە ەسە ارتتى. بيزنەسمەندەر دە ءوز قاراجاتىن تاپتى. مۇنىڭ ءبارى – مەملەكەت قازىناسىنا»، — دەدى مەملەكەت باسشىسى.
نازاربايەۆ ەسكە سالا كەتكەندەي، 1400 قازاقستاندىق كومپانيا قۇرىلىسقا ات سالىسقان.
«مەتالل، قۇرىلعىلار، قۇرىلىس ماتەريالدارىن جەتكىزدى. مۋلتيپليكاتيۆتىك اسەر وسى كاسىپورىندار ارقىلى جاسالدى. ادامدار اقشا تاپتى. بيۋدجەتكە دە قاراجات ءتۇستى. ەكسپو كورمەسىنە كەلۋشىلەرگە سالىنعان 1400 پاتەر باسپاناعا مۇقتاج قازاقستان ازاماتتارىنا، استانالىقتارعا ساتىلادى»، — دەدى بۇل رەتتە پرەزيدەنت.
استانادان كەيىن...
ءيا، مۇنى دا ايتۋ كەرەك شىعار. استانادان كەيىن ەكسپو دۋبايدا وتەدى. 2020 جىلى. الدىن الا باعالاۋ بويىنشا، ونىڭ وتكىزىلۋىنە وراي ينفراقۇرىلىمعا قاجەتتى قاراجات سەگىز ميلليارد دوللاردى قۇرايدى.
بۇل كورمەگە شامامەن 25 ميلليون ادام جينالادى دەپ كۇتىلۋدە. الەمدىك قاۋىمداستىقتىڭ يننوۆاسيالىق جانە تەحنولوگيالىق الەۋەتىن تانىستىرۋ "اقىلدى بىرىكتىرۋ، بولاشاقتى قۇرۋ" ۇرانى اياسىندا التى اي كولەمىندە وتكىزىلەدى.
