8 Naýryz merekesi qarsańynda Jetisý oblysynyń ortalyǵy Taldyqorǵan qalasynda turǵyn úi kezeginde turǵan halyqtyń áleýmettik osal tobyna jatatyn 23 kópbalaly otbasyǵa «Bereke» kottedj qalashyǵynan baspana berildi,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Osy kúni jańa úige ie bolǵandardyń biri - bes balanyń anasy Altyngúl Shaimerdenova.
"Búgin qatty tolqyp turmyn, qýanyshymda shek joq. Úidiń kezegine turǵanyma 12 jyl bolǵan. Búgin ózim siiaqty qanshama kóp balaly otbasy baspanaly bolýdyń baqytyn sezinip jatyr. Árbir áýletke osyndai qýanysh buiyrsyn", - dedi ol.
Aita ketsek, «Bereke» kottedj qalashyǵynda taǵy 107 kottedjdiń qurylys jumystary jyl sońyna deiin tolyq aiaqtalady dep josparlanýda.
"Búgingi kúni Taldyqorǵan qalasy boiynsha 15 myńnan astam adam turǵyn úi kezeginde tur. Soǵan sáikes búginde halyqty baspanamen qamtý jumysy qarqyndy túrde júzege asyrylyp keledi. Turǵyn úi salý jumystaryn ótken jyldarǵa qaraǵanda eki esege ulǵaityp jatyrmyz. Jyl saiyn shamamen 1500-ge jýyq baspanany qoldanysqa beretin bolsaq, turǵyn úi kezegin barynsha azaitamyz", - deidi qalalyq turǵyn úi qatynastary bóliminiń basshysy Tanat Tóleýǵaliuly.
Taldyqorǵan qalasy ákimdiginiń málimetine qaraǵanda, osy jyldyń basynan beri áleýmettik osal toptaǵy 125 otbasy turǵyn úimen qamtamasyz etilip otyr. Al jyl sońyna deiin baspana beriletin otbasylardyń sany 1400-den asady dep mejelengen.
