Qaitarylǵan aktivterden taǵy shamamen 8 mlrd teńge áleýmettik nysandarǵa baǵyttaldy, - dep habarlaidy Dalanews.kz.
Memleket basshysynyń tapsyrmasy boiynsha "Zańsyz iemdenilgen aktivterdi memleketke qaitarý týraly" Zań sheńberinde qaitarylǵan qarajat esebinen áleýmettik nysandardyń qurylysyn qarjylandyrý jalǵasyp jatyr.
Úkimet Aqtóbe qalasynda erekshe balalarǵa arnalǵan arnaiy balabaqsha salýǵa shamamen 7,8 mlrd teńge bólý týraly sheshim qabyldady.
Balabaqshanyń ashylýy 300 erekshe balany tárbiemen jáne túzetý kómegimen qamtamasyz etedi. Mekeme mektep jasyna deiingi balalarǵa jaily bolý, damytý jáne oqytý úshin barlyq qajetti zattarmen jabdyqtalady.
Búgingi tańda oblysta erekshe bilim berýdi qajet etetin 3 jastan 6 jasqa deiingi 2523-ten astam bala bar, olardyń 1320-y mektepke deiingi bilimmen qamtylǵan. Qazir oblys boiynsha 4 arnaiy túzetý balabaqshasy jumys isteidi. Jobany iske asyrý qajetti infraqurylymdy qurýǵa jáne erekshe qajettilikteri bar balalardy damytý men tárbieleýdi qamtýdy keńeitýge múmkindik beredi.
Aita keteiik, buǵan deiin Aqmola oblysynyń Zerendi aýylynda sport keshenin, Túrkistan oblysynyń Temirlan aýylynda mýzyka mektebin, Arqalyq qalasynda daryndy sportshy balalarǵa arnalǵan sport keshenin, Astanada tirek-qimyl apparaty buzylǵan balalarǵa arnalǵan ońaltý ortalyǵyn, Almatyda erekshe qajettilikteri bar adamdarǵa arnalǵan jattyǵý ortalyǵyn salý jónindegi jobalardy qarjylandyrý týraly sheshim qabyldanǵan bolatyn.
