Júzege asqan joba qala turǵyndaryn senimdi gazben qamtamasyz etýge múmkindik beredi. Sondaı-aq, joba «Turan», «Ońtústik-SHyǵys» gaz jylý stansıalaryna, Úrker (Ilınka), Prıgorodnyı, Óndiris, Kırpıchnyı eldi mekenderine joǵary qysymdy jelilerdi qosýdy qamtamasyz etti.
Jobany iske asyrýdyń arqasynda avtonomdy qazandyqtardan ortalyq gazben jabdyqtaýǵa «Býdapesht», «Cosmic City», «Family Town» kóppáterli turǵyn úı keshenderi qosyldy.
Sol sıaqty jaqyn arada «Kýrshevel» turǵyn úı kesheni qosylady. Bul úılerdiń turǵyndary turǵyn úı keshenin ortalyq gazben jabdyqtaýǵa kóshirý týraly qala ákimdigine birneshe ret ótinish bergen bolatyn. Endi turǵyndar ózderiniń kópten kútken gazdaryna qoldary jetip, qýanyshtary qoıyndaryna syımaı júr.
Búginde bas qalamyzdy gazdandyrýdyń mańyzy zor. Gazdandyrý isi qala turǵyndaryn turmysyn jaqsartyp qoımaıdy, sonymen qatar shahardaǵy ekologıalyq ahýaldyń jaqsarýyna da septigin tıgizedi. Bul qala turǵyndary úshin óte mańyzdy.
Tabıǵı gazdy paıdalaný turǵyndardyń jylý aqysyn aıtyp, suıytylǵan munaı gazymen qamtamasyz etýde týyndaǵan problemalardy barynsha sheshedi.
Bıylǵy kúzde «Ońtústik-SHyǵys» gaz jylý stansıasynyń qurylysy, «Turan» stansıasynyń birinshi kezegi, qurylysy uzaqqa sozylǵan JEO-3-tiń birinshi kezegi aıaqtaldy. Jylýmen qamtıtyn úsh nysannyń qýaty – 1140 Gkal/saǵ. Osylaısha, bıylǵy jylytý maýsymynda qalada jylý profısıti baıqalady.
Kelesi jyly birinshi kezekte «Telman» gaz jylý stansıasyn jáne ekinshi kezekte «Turan» gaz jylý stansıasyn paıdalanýǵa berý josparlanyp otyr. Bul qalany taǵy 850 Gkal/saǵ jylý qýatymen qamtamasyz etýge múmkindik beredi.
