Kópten kútken qýanysh áleýmettik az qamtylǵan toptardyń ókilderine, az qamtylǵan otbasylar men kóp balaly jáne jalǵyz basty analarǵa buiyrdy.
Qonys toiyn toilaýshylardyń qatarynda 73 jasqa tolǵan keiýana Álekeeva Rabiǵa da bar. Keiýana úshin búgin qos qýanysh qatar keldi. Óitkeni Rabiǵa apa kezekti músheline aiaq basyp otyr. 11 balany tárbielep ósirgen altyn qurasaqty ana, 40 shaqty nemere, 10 shaqty shóbereniń asyl ájesi. Bir ýálettiń qara naryna ainalǵan jannyń memleket biligine aitar alǵysy sheksiz.
– Jyldar boiǵy armanymyz oryndaldy. Halyqtyń jaǵdaiyn jasap jatqan el biligine raqmet. Almaty oblysy ákimi Amandyq Batalovqa analyq alǵysymdy bildiremin. Biz siiaqty samaiyna aq túsken qariiasyn qurmettegen elimnen ainaldym, – dep júrek jardy sózderin arnady.
Baspana kiltin tabystaý rásimi ary qarai «Kóktem» shaǵyn aýdanynda jalǵasyn tapty. Turǵyn úi qurlys jinaq bankiniń salymshylary atalǵan aýdandaǵy № 8 úige qonystandy. 60 páterden turatyn kópqabatty turǵyn úidiń aýmaǵy 5,1 myń sharshy metrdi alyp jatyr. Eldiń panasyna ainalǵan páterdiń qurylysyna 500,8 mln. teńge qarjy jaratylǵan. Bas merdiger «SýrMAK» JShS bolyp tabylady.
Qala kúni sheńberinde el densaýlyǵynyń saqshylary, meditsina mamandary da nazardan tys qalmady. Atalǵan salanyń 16 qyzmetkeri de sý jańa úige qol jetkizgen jaiy bar. Ǵalymjan Raiyluly aq halatty abzal jandarǵa kiltti «Saltanat saraiynda» ótken jiynda tabystady. Sonymen jalpy sany 147 otbasy merke aiasynda úili boldy.
Almaty oblysynda halyqty qoljetimdi turǵyn úimen qamtamasyz etý máselesine erekshe kóńil bólingen.
Jalpy, aǵymdaǵy jyly Memlekettik baǵdarlamalar aiasynda 3 myńǵa jýyq kezekte turǵandardy turǵyn úimen qamtamasyz etý josparlanýda.
– Bizdiń áleýmettik saiasatymyzdyń basty baǵytyn jalǵastyra otyryp, turǵyn úi máselesin sheshý jolynda meditsina qyzmetkerlerine arnap aǵymdaǵy jyly 127 páter satyp alyndy, jyl sońyna deiin Taldyqorǵanda taǵy 64 meditsina qyzmetkeri turǵyn úi alady. Al kelesi jyly arnaiy dárigerler úshin Taldyqorǵan qalasynda 60 páterli turǵyn úidiń qurylysy josparlanǵan, – dedi qala ákimi óz sózinde.
Aita ketý kerek, bul kúni tek qonys toiy ǵana toilanyp qoimai 5 birdei azamat «Taldyqorǵan qalasynyń Qurmetti azamaty» ataǵyn iemdendi.
Atap aitsaq, Almaty oblysy jáne Qazaqstan Respýblikasynyń sport salasynda Eńbegi sińgen azamat Rahymbek Tólendinov, Taldyqorǵan drama teatry ártisi Máken Nurmuhambetova, Taldyqorǵan obaǵa qarsy kúres stantsiiasy direktorynyń orynbasary Valerii Sapojnikov, zeinetker Habdýlla Ibraiymhanov pen "JLC sút" jaýapkershiligi shekteýli kásipornynyń direktory Olga Bogdanova «Taldyqorǵan qalasynyń Qurmetti azamaty» atandy.
Anar SABYROVA, Almaty oblysy.
