Stepnogorsk qalasynda ondaǵan jyl boiy jóndelmegen negizgi jylý magistrali jańǵyrtýdan ótedi, dep habarlaidy dalanews.kz.
Ótken jylytý maýsymynda ǵana qaladaǵy basty jylý magistralinde 72 apat tirkelgen. Qalaǵa jylý jetkizetin bul qubyrlar 1973 jyly paidalanýǵa berilgen. Osy ýaqytqa deiin munda tolyq jańartý júrgizilmei, tek apat bolǵan ýchaskelerdi ýaqytsha qalpyna keltirýmen shektelip kelgen. 2026 jyldyń 1 qańtaryndaǵy jaǵdai boiynsha «JEO-Qala» jylý jelisiniń tozý deńgeii 70,3%-ǵa jetken.
Endi «Energetikalyq jáne kommýnaldyq sektorlardy jańǵyrtý» ulttyq jobasy aiasynda magistral tolyq qaita qurylady. Aqmola oblysy boiynsha Tabiǵi monopoliialardy retteý departamentiniń málimetinshe, joba 2026-2027 jyldary iske asyrylady. Qazir qubyr jetkizýge kelisimsharttar rásimdelip, merdiger uiymdarmen jumystar júrgizilip jatyr. Jaqyn kúnderi eski jelilerdi demontajdaý bastalady.
«Jumystardy júrgizý kezinde otandyq óndirýshilerdiń materialdary qoldanylady. Bul aldyn ala oqshaýlanǵan bolat qubyrlar, burylystar, tirekter, tarmaqtar, armatýra men metall buiymdary, temirbeton ónimderi jáne taǵy basqa materialdar. Jalpy 36 túrli ónim paidalanylady», – dedi «RemEnergoMash» JShS direktory Andrei Tishkov.
Al «Stepnogorsk Teplotranzit» JShS direktory Egor Lysenko jumystardyń belgilengen keste boiynsha júrip jatqanyn aitty.
«Jumystar kestege sáikes júrip jatyr jáne biyl 1 qyrkúiekke deiin oryndalady», – dedi ol.
Jobanyń birinshi kezeńinde 4,823 shaqyrym jylý magistrali aýystyrylady. Ekinshi kezeńde taǵy 4,673 shaqyrym jeli jańartylady. Jalpy investitsiia kólemi 5,8 mlrd teńgeni quraidy. Joba «Qazaqstan Turǵyn úi Kompaniiasy» tarapynan paiyzdyq mólsherlemeni ishinara sýbsidiialaý arqyly qarjylandyrylady.
Joba aiaqtalǵannan keiin 20 431 abonent sapaly jylýmen qamtamasyz etiledi. Onyń ishinde 288 kópqabatty turǵyn úi, 14 jeke úi jáne 154 túrli nysan bar.
Sonymen qatar 25 ýaqytsha jáne 30 turaqty jumys orny ashylady.
Jańǵyrtý nátijesinde «JEO-Qala» negizgi qubyrynyń tozý deńgeii 20,8%-ǵa tómendeidi dep kútilip otyr.
Aita keteiik, «Energetikalyq jáne kommýnaldyq sektorlardy jańǵyrtý» ulttyq jobasy 2029 jylǵa deiin júzege asyrylady. Baǵdarlama aiasynda respýblika boiynsha kommýnaldyq infraqurylym tozýyn 40%-ǵa deiin tómendetip, apat qaýpin 20%-ǵa qysqartý josparlanǵan.
