Búgin Almaty oblysyn 2022 jyldyń maýsymynan beri basqarǵan Marat Sultanǵaziev qyzmetinen ketti. Onyń ákim retindegi kezeńi óńirdiń qaita qurylyp, oblys ortalyǵynyń Qonaev qalasyna kóshirilýimen tuspa-tus keldi. Osy ýaqyt aralyǵynda Almaty oblysy ekonomikalyq kórsetkishter boiynsha aitarlyqtai ósimge qol jetkizip, elimizdegi jetekshi óńirlerdiń qataryna qosyldy, dep habarlaidy dalanews.kz.
Ekonomika kólemi eki esege jýyq artty
Sońǵy tórt jylda oblystyń jalpy óńirlik ónimi aitarlyqtai ulǵaidy. Eger 2022 jyly bul kórsetkish shamamen 3,4 trln teńge bolsa, búginde 6,8 trln teńgege jetti. Ónerkásip salasynda da oń ózgerister baiqaldy. Óndiris kólemi 1,6 trln teńgeden 2,6 trln teńgege deiin ósti. Onyń basym bóligi, iaǵni shamamen 90 paiyzy óńdeý ónerkásibine tiesili.
Investitsiia kólemi 1,35 trln teńgege jetti
Óńir ekonomikasyna tartylǵan investitsiia kólemi eki eseden astam ósti. Negizgi kapitalǵa salynǵan qarjy 614 mlrd teńgeden 1,35 trln teńgege deiin ulǵaidy. Osy kezeńde jalpy quny 724 mlrd teńgeni quraityn 98 investitsiialyq joba iske qosylyp, nátijesinde shamamen 11 myń jańa jumys orny ashyldy.
Oblystyń qarjylyq derbestigi kúsheidi
Tórt jyl ishinde oblys biýdjetiniń menshikti kiristeri 2,4 ese artty. Sonymen birge respýblikalyq biýdjetten bólinetin transfertterdiń úlesi 33 paiyzdan 13 paiyzǵa deiin qysqardy. Buryn donor-aýdan mártebesine tek Qarasai men Ile aýdandary ie bolsa, qazir olardyń qataryna Eńbekshiqazaq, Talǵar, Jambyl aýdandary jáne Qonaev qalasy qosyldy.
Mektep tapshylyǵyn azaitýǵa basymdyq berildi
Halyq sanynyń qarqyndy ósýi bilim berý infraqurylymyna úlken júkteme túsirdi. Soǵan qaramastan, úsh aýysymdy mektepter máselesin sheshý baǵytynda birqatar jumystar atqaryldy. 2022 jyly oblysta 52 úsh aýysymdy mektep bolsa, búginde olardyń sany 23-ke deiin azaidy. Tórt jyl ishinde 75 jańa mektep paidalanýǵa berildi. Onyń ishinde biyl oqý jyly bastalǵanǵa deiin 4200 oqýshy ornyna arnalǵan bes mektep ashyldy.
Qonaev qalasy jańa oblys ortalyǵy retinde qalyptasty
Jańa oblys ortalyǵy Qonaev qalasynyń infraqurylymyn damytý jumystary da osy kezeńde bastaldy. Qalada injenerlik jeliler tartylyp, ákimshilik nysandardyń qurylysy qolǵa alyndy. Aldaǵy jyldary munda teatr, «Qonaev Arena», Oqýshylar saraiy jáne basqa da áleýmettik-mádeni nysandar salý josparlanyp otyr.
Turǵyn úi qurylysy qarqyn aldy
Sońǵy tórt jylda oblysta 3,7 mln sharshy metr turǵyn úi paidalanýǵa berildi. Nátijesinde 6,6 myń azamat baspanamen qamtyldy. Jańa páter ieleriniń qatarynda áleýmettik osal toptarǵa jatatyn turǵyndar da bar.
Aýyl sharýashylyǵynda turaqty ósim saqtaldy
Almaty oblysy aýyl sharýashylyǵy ónimderiniń jalpy kólemi boiynsha respýblikadaǵy ekinshi ornyn saqtap qaldy. Qazirgi tańda óńir eldegi aýyl sharýashylyǵy ónimderiniń 11,6 paiyzyn óndiredi. 2022–2025 jyldary memleket menshigine paidalanylmai jatqan 528 myń gektar aýyl sharýashylyǵy jeri qaitaryldy. Sonymen qatar sýarý júielerin jańǵyrtýǵa 16,3 mlrd teńge bólinip, sý únemdeý tehnologiialary sýarmaly jerlerdiń 41,2 paiyzyna engizildi.
Týrizmniń jańa serpini
Týrizm salasy da óńir ekonomikasynyń mańyzdy baǵyttarynyń birine ainaldy. Biylǵy jaz maýsymynda ǵana Qapshaǵai sý qoimasyna 2 mln-nan astam týrist kelgen. Sondai-aq Kólsai kólderi, Qaiyńdy kóli jáne Kóshpendiler qalashyǵy aýmaqtaryndaǵy infraqurylym jańartylyp, týristik nysandarǵa aparatyn joldar jóndeldi. Sońǵy jyldary Almaty oblysy iri sporttyq jáne mádeni-buqaralyq sharalar ótetin mańyzdy alańdardyń birine ainalyp keledi.
Óńir aldynda turǵan negizgi mindetter
Degenmen, halyq sanynyń qarqyndy ósýi óńir úshin birqatar júieli máselelerdi de ózekti etip otyr. Olardyń qatarynda Almaty aglomeratsiiasyndaǵy áleýmettik jáne injenerlik infraqurylym tapshylyǵy, aýyl sharýashylyǵyn sýmen qamtamasyz etý máselesi jáne bastalǵan iri investitsiialyq jobalardy tolyq aiaqtaý mindeti bar. Osylaisha, Marat Sultanǵazievtiń Almaty oblysyn basqarǵan kezeńi ekonomikanyń eki esege jýyq ósýi, investitsiia kóleminiń artýy, jańa áleýmettik nysandardyń salynýy jáne Qonaev qalasynyń jańa oblys ortalyǵy retinde qalyptasýymen este qaldy.
