Qoǵam belsendisi Beket Qulbaev Atyraý oblysy Jylyoi aýdanyndaǵy munai qaldyqtarymen lastanǵan jerdi rekýltivatsiialaý jumystarynyń nátijesin kórsetti. Video avtorynyń aitýynsha, atalǵan aýmaq Qulsary qalasynyń irgesinde ornalasqan. Ony qalpyna keltirýge biýdjetten shamamen 625 mln teńge bólinip, merdiger retinde "Sigma Stroi Proekt" JShS tartylǵan, dep habarlaidy dalanews.kz.
Jylyoi aýdany ákimdiginiń resmi jaýabynda Qulsary qalasyna qarasty 2,1 gektar jerdiń "SatTransService" JShS qyzmeti saldarynan munai qaldyqtarymen lastanǵany aitylǵan. Kompaniia sot sheshimimen aýmaqty rekýltivatsiialaýǵa mindettelgen. Alaida qarjysynyń bolmaýyna bailanysty tiisti jumystardy júrgizbegen.
Osydan keiin jerdi qalpyna keltirý úshin jobalaý-smetalyq qujattama ázirlenip, saraptamanyń oń qorytyndysy alynǵan. Máseleniń ekologiialyq mańyzy eskerilip, "Sigma Stroi Proekt" JShS-men kelisimshart jasalǵan. Ákimdik rekýltivatsiialaý jumystarynyń tolyq aiaqtalǵanyn habarlaǵan.
Alaida Beket Qulbaev aýmaqta munai qaldyqtarynyń áli de bar ekenin alǵa tartty. Onyń sózinshe, jer qorshalyp, kóshetter otyrǵyzylǵanymen, olarǵa tiisti kútim jasalmaǵan. Munaimen lastanǵan topyraqqa egilgen aǵashtardyń bir bóligi qýrap qalǵan.
"Bul jer Qulsary qalasynyń mańynda ornalasqan. Aýmaq qorshalyp, aǵashtar egilgenimen, kóshetter sýarylmaidy. Munai sińgen topyraqta olardyń qalai ósetini túsiniksiz. Ákimdiktiń jaýabynda jumys tolyq aiaqtaldy delingen. Biraq rekýltivatsiianyń nátijesi osyndai bolýy kerek pe?", - dedi video avtory.
Ol rekýltivatsiia kezinde munai qaldyqtary tolyq tazartylyp, jer bastapqy qalpyna keltirilýge tiis dep esepteidi. Sondai-aq atqarylǵan jumystyń sapasy men oǵan jumsalǵan 625 mln teńgeniń tiimdiligine qatysty jaýapty organdardan túsinikteme berýdi surady.
