Ol Premer-Ministrdiń atyna joldaǵan depýtattyq saýalynda 2015 jyly áielderdiń zeinetkerlik jasyn ulǵaitý týraly sheshim Qazaqstanda 71 jasty quraityn ortasha ómir súrý uzaqtyǵyn eskere otyryp qabyldanǵanyn eske saldy.
2021 jyly bul kórsetkish 70 jasqa deiin tómendedi. Sonymen qatar, 2020 jyly pandemiiaǵa bailanysty elimizde ólim-jitim 22%-ǵa ósti.
Dana Nurjigit osyǵan bailanysty BUU boljamdaryna negizdelgen 2015 jylǵy zeinetaqy reformasy 2022 jyly Qazaqstanda ómir súrý uzaqtyǵy áielder úshin 78 jasty jáne erler úshin 70 jasty quraidy dep esepteidi.
Dana Nurjigitovanyń pikirinshe, áielderge belgilengen zeinetaqy jasy jastar arasyndaǵy jumyssyzdyq deńgeiine de áser etedi.
– Búgingi zeinetaqy zańyna sáikes azamattar jumys oryndaryn bosatpai, 60-63 jasqa deiin otyra beretin bolsa, artynan kele jatqan jańa býynǵa jumys joq degen sóz.
Sońǵy kezderi Úkimettiń zeinetaqy salasyna nazar aýdaryp, aýyr mamandyq ieleriniń zeinetke shyǵý jasyn qaita qaraýdy qolǵa alyp jatqanyn bilemiz.
Osyǵan bailanysty, azamattardyń senatorlarǵa joldaǵan kóptegen ótinishterin eskere otyryp, áielderdiń 58 jasynda zeinetke shyǵý jasyn belgileýdi, al eńbegin odan ári jalǵastyrý máselesin óz erkine qaldyrýdy usynamyz, – dedi Dana Nurjigit.
Senatordyń aitqan derekter boiynsha, qazir Qazaqstanda 453,1 myńǵa jýyq jumyssyz bar. Onyń ishinde 15-28 jas aralyǵyndaǵy 9 262 adam jumys izdep júr jáne olarǵa jyl saiynǵy joǵary oqý oryndarynyń túlekteri qosylady. Olar da árdaiym ýaqytyly jumys taba almaidy.
