Májilis depýtaty Nartai Sársenǵaliev Ádilet ministri Erlan Sársembaevqa elimizdegi avtorlyq quqyqtardyń buzylýy men fonogramma jasaýshylarǵa tólenetin syiaqyǵa qatysty saýal joldady, dep habarlaidy Dalanews.kz.
Onyń aitýynsha, Qazaqstanda resmi tirkelgen 15-16 avtorlyq qoǵam bar. Alaida olardyń kópshiligi avtorlardyń quqyǵyn óreskel buzyp otyr. Depýtat 2023 jylǵy málimetterdi keltire otyryp, ujymdyq avtorlyq basqarý uiymdaryna 1 milliard 550 million teńge túskenin, alaida sonyń tek 439 milliony ǵana avtorlarǵa jetkizilgenin atap ótti.
“Bul — sumdyq jaǵdai. Avtorlyq qoǵamdarǵa túsken qarajattyń 70 paiyzy solardyń ózderinde qalyp, nebári 30 paiyzy ǵana avtordyń qolyna tiedi. Máselen, Shámshi Qaldaiaqovtyń 55 áni oryndalǵany úshin onyń muragerine úsh aida 22 myń teńge ǵana tólengen. Qazir bul soma tipti 18 myń teńgege deiin azaidy. Osy ádiletsizdikti qashan retteisizder? Naqty kúnin aityńyz, óitkeni avtorlar kútip otyr”, — dedi Sársenǵaliev.
Sondai-aq depýtat fonogramma jasaýshylar men oryndaýshylarǵa efirge shyqqan nemese qaita taratylǵan týyndylary úshin qosymsha syiaqy tóleý qajettiligine qatysty zańnyń 39-babyn synǵa aldy. Onyń pikirinshe, bul jasandy mýzykanyń taralýyn yntalandyryp otyr.
“Biz, depýtattar, fonogrammaǵa qarsy kúresip jatyrmyz. Al sizderdiń taraptaryńyzdan kerisinshe, efirge fonogramma qoiǵandar men ony qaita taratqandarǵa jańa talap qoiylyp, oryndaýshylar men fonogramma jasaýshylarǵa taǵy syiaqy tóleý mindettelgen. Bul — olardyń jasandy mýzyka jasaýyna jol ashý emes pe?”, — dedi ol.
Ministr Erlan Sársembaev óz jaýabynda bul máseleniń kúrdeliligin moiyndap, ony sheshý úshin eki baǵytta jumys júrgizilip jatqanyn aitty.
“Birinshiden, zańnamalyq ózgerister qajet. Bul týraly men jaýabymda aityp óttim. Ekinshiden, uiymdastyrýshylyq turǵydan tiisti platforma ázirlep jatyrmyz. Bul jumysty kúzge deiin aiaqtaimyz. Al zań jobasynyń naqty qabyldaný merzimi týraly aitý qiyn, sebebi ol eki palatanyń quzyrynda. Biraq biz zań jobasy qabyldanǵanǵa deiin uiymdastyrýshylyq máselelerdi rettep úlgeremiz dep oilaimyn”, — dedi ministr.
