ءماجىلىس دەپۋتاتى نارتاي سارسەنعالييەۆ ادىلەت ءمينيسترى ەرلان سارسەمبايەۆقا ەلىمىزدەگى اۆتورلىق قۇقىقتاردىڭ بۇزىلۋى مەن فونوگرامما جاساۋشىلارعا تولەنەتىن سىياقىعا قاتىستى ساۋال جولدادى، دەپ حابارلايدى Dalanews.kz.
ونىڭ ايتۋىنشا، قازاقستاندا رەسمي تىركەلگەن 15-16 اۆتورلىق قوعام بار. الايدا ولاردىڭ كوپشىلىگى اۆتورلاردىڭ قۇقىعىن ورەسكەل بۇزىپ وتىر. دەپۋتات 2023 جىلعى مالىمەتتەردى كەلتىرە وتىرىپ، ۇجىمدىق اۆتورلىق باسقارۋ ۇيىمدارىنا 1 ميلليارد 550 ميلليون تەڭگە تۇسكەنىن، الايدا سونىڭ تەك 439 ميلليونى عانا اۆتورلارعا جەتكىزىلگەنىن اتاپ ءوتتى.
“بۇل — سۇمدىق جاعداي. اۆتورلىق قوعامدارعا تۇسكەن قاراجاتتىڭ 70 پايىزى سولاردىڭ وزدەرىندە قالىپ، نەبارى 30 پايىزى عانا اۆتوردىڭ قولىنا تيەدى. ماسەلەن، ءشامشى قالداياقوۆتىڭ 55 ءانى ورىندالعانى ءۇشىن ونىڭ مۇراگەرىنە ءۇش ايدا 22 مىڭ تەڭگە عانا تولەنگەن. ءقازىر بۇل سوما ءتىپتى 18 مىڭ تەڭگەگە دەيىن ازايدى. وسى ادىلەتسىزدىكتى قاشان رەتتەيسىزدەر؟ ناقتى كۇنىن ايتىڭىز، ويتكەنى اۆتورلار كۇتىپ وتىر”، — دەدى سارسەنعالييەۆ.
سونداي-اق دەپۋتات فونوگرامما جاساۋشىلار مەن ورىنداۋشىلارعا ەفيرگە شىققان نەمەسە قايتا تاراتىلعان تۋىندىلارى ءۇشىن قوسىمشا سىياقى تولەۋ قاجەتتىلىگىنە قاتىستى زاڭنىڭ 39-بابىن سىنعا الدى. ونىڭ پىكىرىنشە، بۇل جاساندى مۋزىكانىڭ تارالۋىن ىنتالاندىرىپ وتىر.
“ءبىز، دەپۋتاتتار، فونوگرامماعا قارسى كۇرەسىپ جاتىرمىز. ال سىزدەردىڭ تاراپتارىڭىزدان كەرىسىنشە، ەفيرگە فونوگرامما قويعاندار مەن ونى قايتا تاراتقاندارعا جاڭا تالاپ قويىلىپ، ورىنداۋشىلار مەن فونوگرامما جاساۋشىلارعا تاعى سىياقى تولەۋ مىندەتتەلگەن. بۇل — ولاردىڭ جاساندى مۋزىكا جاساۋىنا جول اشۋ ەمەس پە؟”، — دەدى ول.
مينيستر ەرلان سارسەمبايەۆ ءوز جاۋابىندا بۇل ماسەلەنىڭ كۇردەلىلىگىن مويىنداپ، ونى شەشۋ ءۇشىن ەكى باعىتتا جۇمىس جۇرگىزىلىپ جاتقانىن ايتتى.
“بىرىنشىدەن، زاڭنامالىق وزگەرىستەر قاجەت. بۇل تۋرالى مەن جاۋابىمدا ايتىپ ءوتتىم. ەكىنشىدەن، ۇيىمداستىرۋشىلىق تۇرعىدان ءتيىستى پلاتفورما ازىرلەپ جاتىرمىز. بۇل جۇمىستى كۇزگە دەيىن اياقتايمىز. ال زاڭ جوباسىنىڭ ناقتى قابىلدانۋ مەرزىمى تۋرالى ايتۋ قيىن، سەبەبى ول ەكى پالاتانىڭ قۇزىرىندا. ءبىراق ءبىز زاڭ جوباسى قابىلدانعانعا دەيىن ۇيىمداستىرۋشىلىق ماسەلەلەردى رەتتەپ ۇلگەرەمىز دەپ ويلايمىن”، — دەدى مينيستر.
