Astanadaǵy halyqqa qyzmet kórsetý ortalyǵynda (HQKO) shetel azamattaryna zańsyz qujat rásimdeý isine qatysty sot úkimi jariialandy. Tergeý málimetinshe, bul zańsyz qyzmetten túsken qarjy kólemi 500 mln teńgeden asqan, dep habarlaidy dalanews.kz.
Elordanyń qylmystyq ister jónindegi aýdanaralyq sotynda memleket pen memlekettik qyzmet múddesine qarsy qylmys jasady dep aiyptalǵan on adamǵa qatysty is qaraldy. Olar zańsyz kóshi-qondy uiymdastyryp, odan turaqty tabys taýyp kelgen, dep jazady jýrnalist Mihail Kozachkov.
Tergeý materialdaryna sáikes, zańsyz shema shetel azamattaryna qyzmet kórsetetin HQKO arqyly júzege asyrylǵan. Munda kelgenderdiń bir bóligi Qazaqstanda ýaqytsha turýǵa ruqsat alýǵa, endi bir bóligi jeke sáikestendirý nómirin (JSN) rásimdeýge júgingen. Qyzmet alýshylar deldaldarǵa aqsha tólep otyrǵan, al deldaldar qarajattyń bir bóligin HQKO qyzmetkerlerine berip otyrǵan.
Is materialdarynda Baiqońyr aýdandyq politsiia basqarmasynyń kóshi-qon qyzmetiniń inspektory da atalady. Tergeý nusqasyna sáikes, ol shetel azamattaryn elden shyǵarý qaýpi týyndaǵan jaǵdaida zańsyz shemanyń qatysýshylaryna kómektesip otyrǵan. Quqyq qorǵaý organdarynyń málimetinshe, zańsyz kóshi-qondy uiymdastyrý shemasy úsh jyldan astam ýaqyt jumys istegen. 2025 jyldyń basynda kúdiktilerden jaýap alynyp, keiin olar ustalǵan.
Sotta aiyptalýshylardyń basym bóligi kinásin moiyndaǵan. Soǵan qaramastan birneshe adamǵa bas bostandyǵynan aiyrý jazasy taǵaiyndaldy. Burynǵy politsiia qyzmetkeri Jaýkazyn Qorabaeva zańsyz áreketterden 12 mln teńgeden astam tabys tapqany úshin jeti jylǵa sottaldy. Áiel adam bolǵandyqtan jazany óteý keiinge qaldyrylǵan.
«Azamattarǵa arnalǵan úkimet» memlekettik korporatsiiasynyń qyzmetkerleri Dosymhan Beisenbaev, Sabira Baimuhamedova jáne Jadyra Janabaeva da para alǵany úshin árqaisysy jeti jyldan bas bostandyǵynan aiyryldy. Áielderge qatysty jazany keiinge qaldyrý tártibi qoldanylǵan. Al olardyń áriptesi Baqjan Ákim úsh jylǵa bas bostandyǵynan aiyryldy.
Sot úkimine sáikes, deldal retinde áreket etken Asel Qýanysheva arqyly 193 mln teńge ótken. Ramid Ámirǵali 196 mln teńge alyp, 385 sheteldikke qujat rásimdeýge kómektesken. Al Oryntai Tashkenova 117 mln teńge alyp, 1272 sheteldikke qyzmet kórsetken. Olar HQKO qyzmetkerlerine para bergeni úshin kináli dep tanylǵanymen, aiyppulmen shekteldi.
Al politsiia kapitanyna aqsha jetkizdi dep aiyptalǵan Altynai Aldibaeva jeti jylǵa bas bostandyǵynan aiyryldy. Sonymen qatar qujattardy qoldan jasap, birneshe migrantty aldaǵan Laýra Kopbaevaǵa bas bostandyǵyn shekteý jazasy taǵaiyndaldy. Sot úkimi ázirge zańdy kúshine engen joq.
