Munaily aýdany Besshoqy aýylynda oqýshylarǵa tamaq daiyndaǵan tórt mektep ashanasynyń qyzmetkeri meditsinalyq tekserýden ótpei jumys istegen, dep habarlaidy Dalanews.kz.
Sotta olardyń meditsinalyq tekserýden ótkenin rastaityn jalǵan anyqtamany 5000 teńgege satyp alǵany belgili boldy. Jalǵan qujatta qyzmetkerlerdiń meditsinalyq tekserýden, fliýorografiiadan, dermatologiialyq tekserýden, bakteriologiialyq zertteýden ótkeni jáne jumysqa jiberilgeni jazylǵan.
“Tórt azamatqa qatysty sot úkimi jeltoqsan aiynda shyqty. Olardyń birine 40 ailyq eseptik kórsetkish mólsherinde aiyppul salynsa, qalǵan úsheýine 20 ailyq eseptik kórsetkish kóleminde aiyppul taǵaiyndaldy. Sot úkimi zańdy kúshine endi”, – dedi Munaily aýdandyq sotynyń tóraǵasy Ersin Qaziev.
Iaǵni, sottalǵandardyń birine 148 myń teńge, al qalǵan úsheýine 74 myń teńge kóleminde aiyppul salynǵan.
Aita keteiik, oqiǵa ótken jyly 6 qyrkúiekte Besshoqy aýylynda oryn alǵan. Mektep ashanasynda tústengennen keiin oqýshylardyń densaýlyǵy nasharlap, meditsinalyq kómekke júginýge májbúr boldy. Nátijesinde 460 oqýshy aýrýhanaǵa jatqyzyldy. Barlyǵyna “azyq-túlikten ýlaný” diagnozy qoiyldy.
