"428,7 mlrd teńge...". Asylov jemqorlardan qaitarylǵan aqsha týraly esep berdi

Bas prokýror Berik Asylovtyń atap ótkenindei barymta-syrymtamen kelgen aktivterdi elge qaitarý qarqyndy júrýde. Bul týraly Dalanews.kz habarlaidy. 

Asylovtyń málimetinshe, byltyr 428,7 mlrd teńge mólsherinde urlanǵan aktivter qaitarylǵan.

Zań sýbektilerimen kelisimder boiynsha 48 mlrd teńgeden astam somaǵa 15 áleýmettik jáne investitsiialyq joba iske qosylǵan. 

Halyqaralyq tájiribeni eskere otyryp, sot tártibimen túsiniksiz shyqqan aktivterdi memleket kirisine ainaldyrý praktikasy engizilgen. Qazir nátije bar ekenin aita ketý jón bolady (10 million dollarǵa talap qanaǵattandyryldy, soma óteldi). Sonymen qatar, múlikti erikti túrde keri qaitarý bóliginde sýbektilermen jumys júrgizilip jatyr, – deidi Asylov.

Aita keteiik, memleketke qaitarylǵan aktivterdi satyp, biýdjetke baǵyttaý Qarjy ministrligine qarasty Qaitarylǵan aktivterdi basqarý kompaniiasyna júktelgen. Qaitarylǵan aktivter ártúrli. Bul týraly kompaniianyń bas direktory Qýanyshbek Muqash egjei-tegjeili málimet bergen bolatyn. 

"Buǵan zergerlik buiymdardan bastap jumys istep turǵan kásiporyndarǵa deiingi nysandar kiredi. Kompaniia qurylǵan sátten bastap onyń balansyna jalpy quny 89,9 milliard teńgeni quraityn 70 túrli aktiv – turǵyn jáne kommertsiialyq jyljymaityn múlik, óndiristik bazalar, kompaniialardyń jarǵylyq kapitalyndaǵy úlester, aiaqtalmaǵan qurylys nysandary, jer ýchaskeleri, avtokólikter, taýar-materialdyq qundylyqtar, negizgi quraldar jáne 196 zergerlik buiym berildi", – degen edi buǵan deiin Qýanyshbek Muqash.

Onyń aitýynsha, qaitarylǵan aktivterdi basqarý kompaniiasy Qazaqstan aýmaǵynda ornalas­qan aktivterdi «E-Qazyna» elektrondyq saýda alańy arqyly satady.

"Jalpy somasy 12,6 mlrd teńgeni quraityn 9 aktiv satyl­dy. Shetelde Birikken Arab Ámir­likterinde 2 avtokólik jáne Túr­kiiadaǵy 3 jyljymaityn múlik nysany 4,4 mlrd teńgege satyldy.

Eger aktivti ótkizý múmkin bolmasa, Basqarýshy kompaniia aktivterdi basqarýdyń birneshe balama ádisterin qoldanady. Iaǵni jyljymaityn múlikti múliktik jalǵa berýge de bolady.

Mundai ádisten túsken kiris 276,6 mln teńgeni qurady. Sonymen qatar Basqarýshy kompaniia «Dýman» qonaqúi keshenin, sondai-aq «Jarkent Sý» JShS, «Tulpar» JShS jáne «Kóterme-bólshek saýda ortalyǵy» JShS-nyń 100% úlesterin derbes basqarady. Atalǵan kásiporyndardyń qyz­metinen túsken dividendter (jalpy 229,4 mln teńge) toqsan saiyn Arnaiy memlekettik qorǵa aýdarylady", – degen bolatyn Egemen-ge bergen suhbatynda Qýanysh Jaqsybekuly.

Eske salaiyq, buǵan deiin zańsyz alynǵan aktivter qalai qaitarylyp jatqanyn habarlaǵan edik.