Bul týraly Ortalyq kommýnikatsiialar qyzmetinde ótken baspasóz konferentsiiasynda Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy Dalanews.kz.
"Tótenshe jaǵdai kezinde 42 500 teńge qarastyrylyp, ýaqytsha jumyssyz qalǵan azamattardy qoldaýǵa baǵyttaldy, onyń kúshi 11 mamyrda joiyldy. Qazir demalys kúnderi karantin engizilýde, biraq ol únemi qoldanylmaidy dep oilaimyn. Qazir eldegi jaǵdai sanitarlyq-epidemiologiialyq turǵydan qiyn ekenin taǵy da atap ótkim keledi. Azamattar sanitarlyq talaptardy múldem saqtamaidy, áleýmettik qashyqtyqty ustanbaidy. Sondyqtan búginderi jumys isteitin azamattarǵa ziian keltirmes úshin jumys kúnderi aqsha tabýǵa múmkindigi bolatyndai etip, tek demalys kúnderine karantin qatań túrde qoiylady", - dedi ol.
Sonymen birge, ol biznestegiler úshin "demalys kúndergi" karantin úshin qandai-da bir ótemaqy qarastyrylýy kerek dep atap ótti. Onyń aitýynsha, úkimet pandemiiaǵa bailanysty kez-kelgen stsenarii boiynsha biznes pen qarapaiym adamdardy qoldaý úshin daiyn.
- Úkimet qazan aiyna deiin "0" koeffitsientin qoldana otyryp, túrli salyqtardan, mindetti tólemderden bosatý siiaqty birqatar sharalardy qabyldady. Birqatar salyqtyq jeńildikter qabyldandy, salyqtar men nesielerdi keiinge shegerý sharalary qarastyrylǵan. Jalpy, Memlekettik komissiianyń otyrysynda biznesti qalypty jumys isteý, jumyspen qamtamasyz etý, halyqtyń kiristerin qamtamasyz etý turǵysynan qoldaý, onyń ishinde ainalym kapitaly men investitsiialyq maqsattar úshin ShOB-qa jeńildetilgen nesie berý turǵysynan 43 júieli sharalar qarastyryldy. Osyǵan bailanysty úkimettiń ekonomikalyq blogy óte belsendi jumys istep jatyr, - dep tolyqtyrdy sózin Nurmybetov.
Ol sonymen qatar adamdardyń qashyqtyqtan jumys isteý formatyna kóshýine bailanysty 42 500 teńge ótemaqy tólenbeitinin aitty. Sebebi - Áleýmettik saqtandyrý qorynyń qarjylyq turaqtylyǵy.
- 42 500 ótemaqysy boiynsha biýdjetten arnaiy qarajat qarastyrylǵan joq. Bul rette Memlekettik áleýmettik saqtandyrý qoryndaǵy aqsha paidalanyldy. Onda da ondaǵy aktivterdi, iaǵni investitsiialanýǵa tiisti baǵaly qaǵazdar, qarjy quraldaryn satý arqyly túsken aqsha. Bul rette Ulttyq bank bizge óte jaqsy kómektesti, ol qarjy quraldaryn satyp, ótkizip, qajetti qarajattarmen qamtamasyz etti. Nátijesinde, Áleýmettik saqtandyrý qory aktivindegi 322 milliard teńge jumsaldy. 42 500 myń teńgeden 4 mln 607 myń aldy, - degen ol Áleýmettik saqtandyrý qorynyń qarjylyq múmkindikteri shekteýli bolǵanyn aitty.
Onyń aitýynsha, eger elimizde belgili bir tólemder engizý qajet bolsa, onda ol endi basqa baǵyttardan qarastyrylady.
