Qazaqstannyń Týrizm jáne sport ministrligi vedomstvodaǵy qarjylyq zańbuzýshylyqtar týraly Joǵary aýditorlyq palatanyń (JAP) málimdemesine qatysty pikir bildirdi, dep habarlaidy Dalanews.kz.
Másele neden shyqty
Buǵan deiin JAP jalpy somasy 17 milliard teńgege jýyq qarjylyq zańbuzýshylyqtar anyqtalǵanyn málimdegen. Onyń basym bóligi biýdjet qarajatyn tiimsiz paidalanýǵa qatysty. Atap aitqanda, ákimshilik qyzmetkerlerge berilgen iri kólemdegi syiaqylar synǵa ushyrady.
"2021-2024 jyldary "Sportty damytý direktsiiasynyń" ákimshilik qyzmetkerlerine 3,5 milliard teńgeden astam syiaqy tólengen. Keibir jaǵdailarda syiaqy somasy jalaqy qorynan asyp ketken. Bir qyzmetkerge ortasha eseppen jylyna 7,7 million teńgeden berilgen. Sonymen qatar, oqý-jattyǵý protsesiniń sapasy úshin tólenetin ústemeaqylar tikelei sportshylarmen jumys istemeitin qyzmetkerlerge de berilgen", – delingen JAP málimdemesinde.
Ministrlik jaýaby
Ministrlik taratqan baspasóz habarlamasynda Joǵary aýditorlyq palata júrgizgen aýdit jumys tártibinde jáne ózara tolyq is-qimyl jaǵdaiynda ótkenin habarlady.
"Aýditorlyq palata kórsetken problemalardyń basym bóligi ministrlikke qarasty bir mekemeniń qyzmetine qatysty. Mundai derekter boiynsha tergeý 2023 jyldan beri jalǵasýda. Ministrlik quqyq qorǵaý organdarymen tyǵyz jumys istep jatyr. Qorytyndysynda zań sheńberinde tolyq quqyqtyq baǵa beriledi", – delingen ministrlik habarlamasynda.
17 milliard teńge qaidan shyqty
Ministrliktiń málimetinshe, esepte kórsetilgen 17 milliard teńge kólemindegi qarjylyq másele búkil salany josparlaý, baqylaý jáne shyǵyndardyń tiimdiligin baǵalaý júiesindegi júieli máselelerge qatysty.
