قازاقستاننىڭ تۋريزم جانە سپورت مينيسترلىگى ۆەدومستۆوداعى قارجىلىق زاڭبۇزۋشىلىقتار تۋرالى جوعارى اۋديتورلىق پالاتانىڭ (جاپ) مالىمدەمەسىنە قاتىستى پىكىر ءبىلدىردى، دەپ حابارلايدى Dalanews.kz.
ماسەلە نەدەن شىقتى
بۇعان دەيىن جاپ جالپى سوماسى 17 ميلليارد تەڭگەگە جۋىق قارجىلىق زاڭبۇزۋشىلىقتار انىقتالعانىن مالىمدەگەن. ونىڭ باسىم بولىگى بيۋدجەت قاراجاتىن ءتيىمسىز پايدالانۋعا قاتىستى. اتاپ ايتقاندا، اكىمشىلىك قىزمەتكەرلەرگە بەرىلگەن ءىرى كولەمدەگى سىياقىلار سىنعا ۇشىرادى.
"2021-2024 جىلدارى "سپورتتى دامىتۋ ديرەكسياسىنىڭ" اكىمشىلىك قىزمەتكەرلەرىنە 3،5 ميلليارد تەڭگەدەن استام سىياقى تولەنگەن. كەيبىر جاعدايلاردا سىياقى سوماسى جالاقى قورىنان اسىپ كەتكەن. ءبىر قىزمەتكەرگە ورتاشا ەسەپپەن جىلىنا 7،7 ميلليون تەڭگەدەن بەرىلگەن. سونىمەن قاتار، وقۋ-جاتتىعۋ پروسەسىنىڭ ساپاسى ءۇشىن تولەنەتىن ۇستەمەاقىلار تىكەلەي سپورتشىلارمەن جۇمىس ىستەمەيتىن قىزمەتكەرلەرگە دە بەرىلگەن"، – دەلىنگەن جاپ مالىمدەمەسىندە.
مينيسترلىك جاۋابى
مينيسترلىك تاراتقان باسپا ءسوز حابارلاماسىندا جوعارى اۋديتورلىق پالاتا جۇرگىزگەن اۋديت جۇمىس تارتىبىندە جانە ءوزارا تولىق ءىس-قيمىل جاعدايىندا وتكەنىن حابارلادى.
"اۋديتورلىق پالاتا كورسەتكەن پروبلەمالاردىڭ باسىم بولىگى مينيسترلىككە قاراستى ءبىر مەكەمەنىڭ قىزمەتىنە قاتىستى. مۇنداي دەرەكتەر بويىنشا تەرگەۋ 2023 جىلدان بەرى جالعاسۋدا. مينيسترلىك قۇقىق قورعاۋ ورگاندارىمەن تىعىز جۇمىس ىستەپ جاتىر. قورىتىندىسىندا زاڭ شەڭبەرىندە تولىق قۇقىقتىق باعا بەرىلەدى"، – دەلىنگەن مينيسترلىك حابارلاماسىندا.
17 ميلليارد تەڭگە قايدان شىقتى
مينيسترلىكتىڭ مالىمەتىنشە، ەسەپتە كورسەتىلگەن 17 ميلليارد تەڭگە كولەمىندەگى قارجىلىق ماسەلە بۇكىل سالانى جوسپارلاۋ، باقىلاۋ جانە شىعىنداردىڭ تيىمدىلىگىن باعالاۋ جۇيەسىندەگى جۇيەلى ماسەلەلەرگە قاتىستى.
