Shyǵys Qazaqstan oblysynda burynǵy kólik prokýrory asa iri kólemdegi alaiaqtyq áreketi úshin sotqa tartyldy. Ol tergeý kezinde tárkilengen qujattardy "qaitaryp beremin" dep, kásipkerden 30 million teńge suraǵan, dep habarlaidy Dalanews.kz.
YK-news.kz málimetinshe, oqiǵa biyl sáýir aiynda bolǵan. Óskemen qalasyndaǵy kólik kompaniiasy filialynyń direktory tergeý aiasynda alynǵan qujattardyń taǵdyryn bilý maqsatynda burynǵy prokýrormen bailanysqa shyqqan. Sot materialdaryna súiensek, eks-prokýror bul iske múlde qatysy bolmasa da, "qujattardy on kún ishinde qaitaramyn" degen jeleýmen 30 million teńge talap etken.
Kásipker men onyń júrgizýshisi bul usynysqa kúmándanyp, Ulttyq qaýipsizdik komitetine habar bergen. Nátijesinde arnaiy operatsiia uiymdastyrylyp, burynǵy prokýror júrgizýshisi arqyly 10 million teńge kóleminde naqty aqsha men 20 million teńgelik jalǵan kýpiýralar mýliajyn alǵan kezde qolǵa túsken. Kelesi kúni tintý barysynda bul qarajat tárkilendi.
Óskemen qalasynyń №2 soty eks-prokýrordy QR QK 190-babynyń 4-bóligi, 2-tarmaǵy jáne 24-babynyń 3-bóligi boiynsha — qyzmettik jaǵdaiyn paidalana otyryp, asa iri kólemde alaiaqtyq jasaýǵa oqtalý áreketi úshin — kináli dep tanydy. Sot úkimimen oǵan 3 jyl 9 ai bas bostandyǵynan aiyrý jáne ómir boiy memlekettik ári kvazimemlekettik organdarda jumys isteýge tyiym salý jazasy taǵaiyndaldy.
Sottalǵan azamat jazasyn ortasha qaýipsizdik deńgeiindegi túzeý mekemesinde óteitin bolady. Ol kinásin tolyq moiyndap, ókinish bildirgenimen, sot sheshimimen kelispei, apelliatsiialyq shaǵym túsirdi. Úkim zańdy kúshine engen joq.
