شىعىس قازاقستان وبلىسىندا بۇرىنعى كولىك پروكۋرورى اسا ءىرى كولەمدەگى الاياقتىق ارەكەتى ءۇشىن سوتقا تارتىلدى. ول تەرگەۋ كەزىندە تاركىلەنگەن قۇجاتتاردى "قايتارىپ بەرەمىن" دەپ، كاسىپكەردەن 30 ميلليون تەڭگە سۇراعان، دەپ حابارلايدى Dalanews.kz.
YK-news.kz مالىمەتىنشە، وقيعا بيىل ءساۋىر ايىندا بولعان. وسكەمەن قالاسىنداعى كولىك كومپانياسى فيليالىنىڭ ديرەكتورى تەرگەۋ اياسىندا الىنعان قۇجاتتاردىڭ تاعدىرىن ءبىلۋ ماقساتىندا بۇرىنعى پروكۋرورمەن بايلانىسقا شىققان. سوت ماتەريالدارىنا سۇيەنسەك، ەكس-پروكۋرور بۇل ىسكە مۇلدە قاتىسى بولماسا دا، "قۇجاتتاردى ون كۇن ىشىندە قايتارامىن" دەگەن جەلەۋمەن 30 ميلليون تەڭگە تالاپ ەتكەن.
كاسىپكەر مەن ونىڭ جۇرگىزۋشىسى بۇل ۇسىنىسقا كۇماندانىپ، ۇلتتىق قاۋىپسىزدىك كوميتەتىنە حابار بەرگەن. ناتيجەسىندە ارنايى وپەراسيا ۇيىمداستىرىلىپ، بۇرىنعى پروكۋرور جۇرگىزۋشىسى ارقىلى 10 ميلليون تەڭگە كولەمىندە ناقتى اقشا مەن 20 ميلليون تەڭگەلىك جالعان كۋپيۋرالار مۋلياجىن العان كەزدە قولعا تۇسكەن. كەلەسى كۇنى ءتىنتۋ بارىسىندا بۇل قاراجات تاركىلەندى.
وسكەمەن قالاسىنىڭ №2 سوتى ەكس-پروكۋروردى ق ر قك 190-بابىنىڭ 4-بولىگى، 2-تارماعى جانە 24-بابىنىڭ 3-بولىگى بويىنشا — قىزمەتتىك جاعدايىن پايدالانا وتىرىپ، اسا ءىرى كولەمدە الاياقتىق جاساۋعا وقتالۋ ارەكەتى ءۇشىن — كىنالى دەپ تانىدى. سوت ۇكىمىمەن وعان 3 جىل 9 اي باس بوستاندىعىنان ايىرۋ جانە ءومىر بويى مەملەكەتتىك ءارى كۆازيمەملەكەتتىك ورگانداردا جۇمىس ىستەۋگە تىيىم سالۋ جازاسى تاعايىندالدى.
سوتتالعان ازامات جازاسىن ورتاشا قاۋىپسىزدىك دەڭگەيىندەگى تۇزەۋ مەكەمەسىندە وتەيتىن بولادى. ول كىناسىن تولىق مويىنداپ، وكىنىش بىلدىرگەنىمەن، سوت شەشىمىمەن كەلىسپەي، اپەللياسيالىق شاعىم ءتۇسىردى. ۇكىم زاڭدى كۇشىنە ەنگەن جوق.
