25 tamyzdan bastap júrgizýshilerge qatysty jańa talaptar kúshine enedi. Bul týraly Ishki ister ministrligi málimdedi, dep habarlaidy dalanews.kz.
Endi 65 jastan asqan jáne múgedektigi bar júrgizýshiler eki jyl saiyn mindetti meditsinalyq tekseristen ótýge tiis. Tekseris týraly málimet Densaýlyq saqtaý jáne Ishki ister ministrlikteriniń aqparattyq júieleri arqyly avtomatty túrde tekseriledi. Júrgizýshiniń meditsinalyq tekseristen ótkeni rastalmasa nemese kólik basqarýǵa qarsy kórsetilim anyqtalsa, onyń júrgizýshi kýáliginiń kúshi toqtatylady. Bul talap tek osy sanattaǵy júrgizýshilerge qatysty.
Sondai-aq, jol qozǵalysy erejesin óreskel buzǵan júrgizýshilerge teoriialyq emtihandy qaita tapsyrý mindettelýi múmkin. Mundai jaǵdailarǵa jol apatyn týǵyzý, jyldamdyqty birneshe ret asyrý, qaýipti manevr jasaý, jolaq aýystyrý nemese basyp ozý erejesin buzý jatady. Júrgizýshi eki ai ishinde emtihanǵa dáleldi sebepsiz kelmese, onyń kólik basqarý quqyǵy toqtatylady.
Budan bólek, mas kúide kólik júrgizetinderge jaza kúsheitiledi. Qylmystyq is jábirlenýshimen tatýlasýǵa bailanysty toqtatylsa da, quqyq buzǵan adam segiz jylǵa kólik júrgizý quqyǵynan aiyrylady. Al júrgizýshi kýáligi joq adamdar osy merzim ishinde ony ala almaidy.
