Belgili zańger Meiirman Shekeev áleýmettik jelidegi paraqshasynda qýanyshty habardy jetkizdi, dep habarlaidy Dalanews.kz.
Zańgerdiń sózinshe, Resei arqyly Ýkrainaǵa ketpek bolǵan 25 bala týǵan jerine oralyp, ata-analarymen qaýyshqan.
“Qanshama uiqysyz ótken ata-analardyń sóngen úmitin tynymsyz eńbektiń arqasynda qaita jaǵyp, qýanyshtaryn kórý men úshin eń úlken baqyt! Ata-ananyń alǵysynan asqan marapat joq. Arnaiy Taldyqorǵannan jáne jan-jaqtan kelgen ata-analardyń alǵys bildirýi – biz úshin eń úlken qurmet. Týysymdai bolyp ketken bul ata-analardyń dastarhany budan bylai tek jaqsylyqqa jaiylsyn dep tileiik. Árbir ana tek qýanyshqa jylasyn", – dep jazdy ol.
Eske salaiyq, buǵan deiin Resei men Ýkraina arasyndaǵy qaqtyǵysta tek eki eldiń emes, úshinshi memleketterdiń de azamattary júrgeni týraly jazǵan edik.
Soǵysta qansha qazaqstandyq júr?
Resmi derekter boiynsha, 2022 jyldan bastap Ýkrainada júrip jatqan soǵysqa qatysqany úshin 30-dan astam Qazaqstan azamaty anyqtalǵan. Bul — naqty tirkelgender ǵana. Sarapshylar bul san odan áldeqaida joǵary bolýy múmkin ekenin joqqa shyǵarmaidy.
QR Bas prokýratýrasy men Ulttyq qaýipsizdik komitetiniń derekteri boiynsha, qazaqstandyqtardyń basym bóligi Resei tarapynda jaldamaly nemese erikti retinde soǵysqa qatysýda. Alaida Ýkraina jaǵynda júrgender de kezdesedi. Máselen, 2023 jyly Ýkraina Qarýly kúshteri jaǵynda erikti retinde soǵysqan bir qazaqstandyqtyń elge oralyp, jaýapqa tartylǵany belgili boldy.
Sonymen qatar, "Ómir súrgim keledi" jobasy Resei áskeriniń qatarynda Ýkrainadaǵy soǵysqa qatysyp júrgen qazaqstandyqtardyń tizimin jariialaǵan edi. Joba málimetinshe, soǵysqa 600-den astam qazaqstandyq attanǵan. Tizimde 264 adamnyń aty-jóni kórsetilgen, olardyń arasynda qazaq azamattary da bar.
Zań ne deidi?
Qazaqstan zańnamasy boiynsha, shet memleketterdiń aýmaǵyndaǵy qarýly qaqtyǵystarǵa qatysý qylmystyq jaýapkershilikke jatady. Bul QR Qylmystyq kodeksiniń 172-baby boiynsha retteledi:
- 172-bap, 1-bólik: Shet memleket aýmaǵynda jaldamaly retinde soǵysqa qatysqandar — 5 jyldan 9 jylǵa deiin bas bostandyǵynan aiyrylady.
- Eger bul is uiymdasqan top quramynda nemese birneshe ret jasalsa — 10 jyldan 15 jylǵa deiin bas bostandyǵynan aiyrý qarastyrylǵan.
2023 jyly Qyrǵyzstanda birneshe azamat jaldamalylar qataryna qosylǵany úshin sottalǵan. Qazaqstanda da osyǵan uqsas jaǵdailar tirkelip otyr: kem degende 8 adam jaýapqa tartylǵan. Olar Ýkrainadaǵy soǵys aimaǵynan elge oralǵan sátte ustalǵan.
