2025 jyldyń birinshi jartyjyldyǵynda elimizdegi elektr energiiasyn tutyný 3%-ǵa ósip, 61,8 mlrd kVt⋅saǵ-qa jetti. Energiia tasymaldaý kólemi 7,3%-ǵa artty. Boljam boiynsha, 2031 jylǵa qarai Qazaqstanda elektr qýatyna degen suranys 4,8 GVt-qa deiin artýy múmkin. Bul týraly "KEGOC" AQ-tyń atalǵan kezeń boiynsha usynǵan esebinde aitylady, dep habarlaidy Dalanews.kz.
"Senimdi energetikalyq infraqurylym – bul ónerkásiptik saiasat pen investitsiialyq tartymdylyqtyń irgetasy. Memleket basshysynyń tapsyrmasymen biz dástúrli generatsiiany, jańartylatyn energiia kózderi salasyndaǵy aýqymdy jobalardy jáne bolashaq atom elektr stantsiiasyn úilestire otyryp, energetikany proaktivti damytýǵa kóship jatyrmyz. KEGOC-tyń jumysy – osy jospardyń ózegi. Bul jobalar bolashaq ekonomikamyzdyń qan tamyr júiesin qalyptastyryp, ulttyq energetikalyq júieni nyǵaitý boiynsha asa mańyzdy mindetterdi sheshedi", – dedi Energertika ministri Erlan Aqkenjenov.
Infraqurylymdy ilgeriletip damytý úshin KEGOC buryn-sońdy bolmaǵan investitsiialyq baǵdarlamany júzege asyrýda. Qazaqstannyń Batys aimaǵynyń energiia júiesin Birtutas elektr energetikalyq júiemen biriktirý jónindegi tarihi joba belsendi iske asyrylýda. 600 km-den asatyn 500 kV jeli barlyq óńirlerdi alǵash ret birtutas, neǵurlym ornyqty jáne basqarylatyn júiege biriktiredi.
Halqy tyǵyz ornalasqan ońtústik óńirlerdegi jelilerdi jańǵyrtý "Soltústik–Ońtústik" tranzitiniń ótkizý qabiletin 440 MVt-qa arttyrady. Bul ósip kele jatqan suranysty óteý jáne jańa elektr stantsiialaryn biriktirý úshin asa mańyzdy.
"Soltústik–Ońtústik" baǵyty boiynsha turaqty tok jelisiniń qurylysy bastaldy. Bul qýatty arteriia bolashaq atom elektr stantsiiasyn jáne jańartylatyn energiia kózderiniń iri nysandaryn biriktirýdiń negizi bolady.
Astanany elektrmen jabdyqtaý irkilisterinen qorǵaý maqsatynda jańa 500 kV tsifrlyq qosalqy stantsiiasy salynady. Ol elorda úshin ekinshi táýelsiz qýat kózin qalyptastyrady.
Uzaqmerzimdi perspektivada (2035 jylǵa deiin) KEGOC 17 000 km-den astam elektr jetkizý jelilerin salýdy jáne qaita jańartýdy josparlap otyr. Bul jumys Úkimettiń 26 GVt jańa generatsiialyq qýat kózin iske qosý josparyna tolyq sáikes júrgizilýde.
"KEGOC" AQ Basqarma tóraǵasy Nábi Aitjanov kompaniianyń alda júretin damý strategiiasyn ustanatynyn atap ótti.
"Bizdiń mindet – búgingi kúni de elektr energiiasyn turaqty jetkizýdi qamtamasyz etip, sonymen qatar Qazaqstannyń onjyldyqtar boiǵy ornyqty damýynyń irgetasy bolatyn intellektýaldy ári ikemdi jelini salý. Biz jańa zaýyttardy, tsifrlyq jobalardy jáne árbir qazaqstandyqtyń ómir súrý sapasyn arttyrýdy energiiamen qamtamasyz etemiz", – dedi Nábi Aitjanov.
Tórt iri joba boiynsha iske asyrý merzimderi qysqartyldy, bul Úkimet tarapynan energetikalyq qaýipsizdik máselelerine joǵary basymdyq berilgenin kórsetedi.
