AQSh prezidenti Donald Tramp óz ornyn basýy múmkin úmitkerge qatysty jaqyn ainalasymen keńesip júr. Ol tańdaýdy vitse-prezident Djei Di Vens pen memlekettik hatshy Marko Rýbio arasynda jasap otyr. Bul týraly Axios portaly málimdedi, dep habarlaidy Dalanews.kz.
Basylymnyń jazýynsha, Tramp saiasatkerler tandemi jaily jii oi qozǵap, keńesshilerinen bolashaqta kimdi aldyńǵy qatarǵa qoiý kerektigin surap júr.
«Prezidenttiń 2028 jylǵa qatysty armany – Vens – Rýbio tandemi, jáne bul jerde basty ról Venske tiesili. <...> Biraq Rýbio – Vens tandemi Trampty qanaǵattandyra ma? Árine», – deidi Tramptyń bolashaqta Respýblikalyq partiianyń kóshbasshysy kim bolýy múmkin ekenin suraǵan keńesshileriniń biri.
Axios dereginshe, Venstiń 2028 jylǵy prezidenttik sailaýǵa túsýi múmkin naýqanyna negiz bolatyn saiasi keńesshiler toby bar. Al Rýbioda mundai daiyn infraqurylym ázirge joq. Soǵan qaramastan, ol Venstiń kandidatýrasyn qoldaýǵa daiyn ekenin aitqan.
«Eger Djei Di Vens prezidenttikke úmitker bolsa, ol bizdiń kandidatymyz bolady. Men ony alǵashqylardyń biri bolyp qoldaimyn», – degen Rýbio 2025 jylǵy suhbatynda.
Sonymen qatar, Tramptyń keńesshileri prezidenttiń muragerin tolyq aiqyndaýǵa asyqpaitynyn aitady. Sebebi bul komanda jumysyna kedergi jasaýy múmkin jáne Tramptyń ózi bilikten aiyrylyp jatqandai áser qaldyrǵysy kelmeidi.
Qańtar aiynyń sońynda Tramp Respýblikalyq partiiada 2028 jylǵy prezident sailaýyna túse alatyn ári onyń saiasatyn jalǵastyratyn birneshe úmitker bar ekenin málimdegen. Ol olardyń qatarynda Vens, Rýbio jáne AQSh qarjy ministri Skott Besent bar ekenin atap ótken.
