اقش پرەزيدەنتى دونالد ترامپ ءوز ورنىن باسۋى مۇمكىن ۇمىتكەرگە قاتىستى جاقىن اينالاسىمەن كەڭەسىپ ءجۇر. ول تاڭداۋدى ۆيسە-پرەزيدەنت دجەي دي ۆەنس پەن مەملەكەتتىك حاتشى ماركو رۋبيو اراسىندا جاساپ وتىر. بۇل تۋرالى Axios پورتالى مالىمدەدى، دەپ حابارلايدى Dalanews.kz.

باسىلىمنىڭ جازۋىنشا، ترامپ ساياساتكەرلەر تاندەمى جايلى ءجيى وي قوزعاپ، كەڭەسشىلەرىنەن بولاشاقتا كىمدى الدىڭعى قاتارعا قويۋ كەرەكتىگىن سۇراپ ءجۇر.

«پرەزيدەنتتىڭ 2028 جىلعا قاتىستى ارمانى – ۆەنس – رۋبيو تاندەمى، جانە بۇل جەردە باستى ءرول ۆەنسكە تيەسىلى. <...> ءبىراق رۋبيو – ۆەنس تاندەمى ترامپتى قاناعاتتاندىرا ما؟ ارينە»، – دەيدى ترامپتىڭ بولاشاقتا رەسپۋبليكالىق پارتيانىڭ كوشباسشىسى كىم بولۋى مۇمكىن ەكەنىن سۇراعان كەڭەسشىلەرىنىڭ ءبىرى.

Axios دەرەگىنشە، ۆەنستىڭ 2028 جىلعى پرەزيدەنتتىك سايلاۋعا ءتۇسۋى مۇمكىن ناۋقانىنا نەگىز بولاتىن ساياسي كەڭەسشىلەر توبى بار. ال رۋبيودا مۇنداي دايىن ينفراقۇرىلىم ازىرگە جوق. سوعان قاراماستان، ول ۆەنستىڭ كانديداتۋراسىن قولداۋعا دايىن ەكەنىن ايتقان.

«ەگەر دجەي دي ۆەنس پرەزيدەنتتىككە ۇمىتكەر بولسا، ول ءبىزدىڭ كانديداتىمىز بولادى. مەن ونى العاشقىلاردىڭ ءبىرى بولىپ قولدايمىن»، – دەگەن رۋبيو 2025 جىلعى سۇحباتىندا.

سونىمەن قاتار، ترامپتىڭ كەڭەسشىلەرى پرەزيدەنتتىڭ مۇراگەرىن تولىق ايقىنداۋعا اسىقپايتىنىن ايتادى. سەبەبى بۇل كوماندا جۇمىسىنا كەدەرگى جاساۋى مۇمكىن جانە ترامپتىڭ ءوزى بيلىكتەن ايىرىلىپ جاتقانداي اسەر قالدىرعىسى كەلمەيدى.

قاڭتار ايىنىڭ سوڭىندا ترامپ رەسپۋبليكالىق پارتيادا 2028 جىلعى پرەزيدەنت سايلاۋىنا تۇسە الاتىن ءارى ونىڭ ساياساتىن جالعاستىراتىن بىرنەشە ۇمىتكەر بار ەكەنىن مالىمدەگەن. ول ولاردىڭ قاتارىندا ۆەنس، رۋبيو جانە اقش قارجى ءمينيسترى سكوتت بەسەنت بار ەكەنىن اتاپ وتكەن.