2026 jyl ekonomika úshin ońai bolaiyn dep turǵan joq. Halyqaralyq valiýta qory (HVQ) boljamyna sáikes, qosylǵan qun salyǵy men korporativtik salyqtyń ósýi, sondai-aq turǵyn úi-kommýnaldyq sharýashylyqtaǵy tarifterdiń qymbattaýy infliatsiiany 11%-ǵa deiin jetkizýi múmkin. Alaida sarapshylar muny ýaqytsha qubylys dep baǵalap otyr, dep habarlaidy Dalanews.kz Inbusiness-ke silteme jasap.
Infliatsiia birtindep tómendeidi
Sarapshylardyń pikirinshe, qatańdaý aqsha-nesie saiasaty infliatsiianyń tómendeýine múmkindik beredi.
Eýraziialyq damý banki (EADB) málimetinshe, 2026 jyldyń sońyna qarai infliatsiia deńgeii 9,7%-ǵa deiin baiaýlaýy yqtimal.
Bul jaǵdai salymshylar úshin mańyzdy signal bolyp otyr.
Ulttyq bank bazalyq mólsherlemeni joǵary ustaidy
Infliatsiia qysymyn tejeý úshin Qazaqstan Respýblikasynyń Ulttyq banki bazalyq mólsherlemeni joǵary deńgeide saqtaýǵa májbúr bolady. Al joǵary mólsherleme - teńgedegi depozitterdiń infliatsiiadan da, ulttyq valiýtanyń álsireý qarqynynan da joǵary tabys ákelýiniń kepili.
Iaǵni 2026 jyly teńgedegi salymdar naqty tabys ákeletin qural bolyp qala beredi.
AQSh-taǵy saiasat Qazaqstanǵa qalai áser etedi?
Qazaqstanda valiýta baǵamy talqylanyp jatqan tusta, AQSh-ta aqsha-nesie saiasaty túbegeili ózgerip jatyr. AQSh Federaldy rezerv júiesi 2025 jyly bazalyq mólsherlemeni úsh ret tómendetip, 2026 jyly taǵy eki ret azaitýdy josparlap otyr.
Bul damýshy elder, sonyń ishinde Qazaqstan úshin qolaily jaǵdai qalyptastyrady. AQSh memlekettik obligatsiialarynyń kiristiligi tómendegen saiyn, jahandyq investorlar joǵary tabys usynatyn basqa naryqtardy izdei bastaidy.
Investorlar teńgege bet burdy
Mundai jaǵdaida investorlar paiyzdyq mólsherleme aiyrmasynan tabys tabý úshin kapitalyn teńgege aýdarady. Qazaqstan qarjygerler qaýymdastyǵy dereginshe, osy úrdistiń aiasynda Qazaqstannyń qor naryǵy 24,4%-ǵa ósip, aitarlyqtai nátije kórsetken.
Dollardyń «jasyryn shyǵyny»
Sarapshylar dollardy jinaq quraly retinde tańdaýdyń taǵy bir kemshiligin atap ótedi. Aiyrbastaý pýnktinde dollar satyp alǵan adam birden 3–4% qarjysynan qaǵylady. Bul - aiyrbas baǵamy men komissiialardan týyndaityn shyǵyn.
Iaǵni búgin dollar satyp alyp, kem degende shyǵynsyz shyǵý úshin teńge dál osy mólsherde qunsyzdanýy kerek. Al teńgedegi depozit kerisinshe - alǵashqy kúnnen bastap tabys ákele bastaidy jáne qosymsha komissiia talap etpeidi.
Qorytyndy
EADB, HVQ derekteri men AQSh Federaldy rezerv júiesiniń saiasatyn eskere otyryp, sarapshylar 2026 jyly teńge jinaq saqtaýdyń eń utymdy quraly bolyp qala beredi degen qorytyndyǵa kelip otyr.
Al «jastyq astyndaǵy dollar» kóbine alańdaýshylyqtyń simvoly retinde qalyp, qazirgi ekonomikalyq jaǵdaida banktik depozit pen salqyn esepke jol beredi.
