Altynnyń baǵasy álemdik naryqtarda qymbattaý ústinde jáne jaqyn bolashaqta onyń bir ýnsıasy 4,2 myń dollar bolýy múmkin, dep habarlaıdy Dalanews.kz.
Mundaı boljammen "Fınam" sarapshysy Nıkolaı Dýdchenko LS basylymyna bergen suqbatynda bólisti.
Comex-te Astana ýaqyty boıynsha saǵat 10:50-de altynnyń bir troıa ýnsıasynyń quny 3 986 dollardy (+0,25%) kórsetip tur. Dýdchenkonyń aıtýynsha, qazirgi ýaqytta ınvestorlar nazary FRJ stavkasynyń traektorıasy men amerıkandyq retteýshi organnyń ózin táýelsiz ustaı alý-almaýyna aýýda.
"Bizdiń oıymyzsha, osy jaıttar qazirgi ýaqytta qymbat metal qunynyń ósimine negiz sebepter bolyp tabylady. Sonymen qatar baǵalarǵa ETF-ke kelip túsken qarajat aǵyny jáne álemdik ortalyq bankter tarapynan artýshy suranys qoldaý kórsetýde. Qysqa merzimdi faktorlardyń ishinde baǵaǵa AQSH úkimetiniń shutdown-y (ýaqytsha jumys istemeýi) jáne Úndistandaǵy zergerlik ónerkásiptiń altynǵa degen suranysyn arttyratyn merekelerdiń bastalýy da áser etken", - deıdi ol.
Sonymen qatar, geosaıasatqa baılanysty dúdamal jaǵdaı mańyzdy faktor bolyp tabylady: Taıaý Shyǵystaǵy qaqtyǵys áli támamdalmady, sonymen qatar Venesýela aınalasyndaǵy shıelenis arta bastady. Bul jaǵdaıda qymbat metal qunynyń tómendeıtindeı naqty alǵysharttar áli baıqalmaıdy.
"Tehnıkalyq taldaý turǵysynan alatyn bolsaq, biz baǵanyń ortasha mánnen aıtarlyqtaı aýytqyp ketkenin kórip otyrmyz, bul, árıne, teris qubylys. Alaıda, onyń yqpaly óte kúshti dep aıta almaımyz", - deıdi Dýdchenko.
İrgeli baǵam turǵysynan kelgende, eger AQSH-taǵy ınflásıalyq jaǵdaı nasharlaı bastasa nemese geosaıası táýekelderdiń beti qaıta bastasa, baǵanyń tómenge ketýine alǵysharttar paıda bolýy múmkin, biraq bul ázirge ekitalaı nárse. Sondyqtan sarapshy qalyptasyp otyrǵan qazirgi úrdis biraz ýaqytqa deıin sozylýy múmkin.
Kásibı qatysýshylar qymbat metaldyń baǵasy jańa jylǵa deıin tarıhı shekti ıgerip, tipti odan asyp túsetinin boljaıdy.
"Bizdiń bazalyq baǵalaýymyzda bir troıa ýnsıasynyń baǵasy 4,2 myń dollar deńgeıinde qalyptasýy múmkin", – deıdi Dýdchenko.
Sondaı-aq, sarapshylar qazirgi ýaqytta altynnan keıin kúmistiń baǵasy da ósetinin atap ótti. Olar jyldyń sońyna qaraı bul qymbat metaldyń bir ýnsıasy 49-50 dollardan joǵary bolatynyn joqqa shyǵarmaıdy.
