Italiiada ótken 2026 jylǵy qysqy Olimpiada oiyndarynda Qazaqstan quramasy bir altyn medal jeńip aldy. Degenmen birqatar sportshy joǵary nátije kórsetip, úzdik ondyqqa endi, dep habarlaidy Dalanews.kz UOK-qa siltep.
El qorjynyna jalǵyz júldeni mánerlep syrǵanaýshy Mihail Shaidorov salyp, Olimpiada chempiony atandy. Qazaqstan quramasynyń birneshe ókili óz jarystarynda alǵashqy ondyqqa kirdi. Olardyń keibir jetistikteri tarihi mańyzǵa ie boldy.
Ilia Mizernyh táýelsiz Qazaqstan tarihyndaǵy eń úzdik nátijeni tirkedi. Shańǵymen úlken tuǵyrdan sekirýde ol segizinshi oryn alyp, osy sport túrindegi ulttyq rekordty jańartty.
Konkimen júgirýshi Nadejda Morozova 3000 metr qashyqta altynshy bolyp márege jetti. Bul - 1998 jyly Liýdmila Prokasheva Olimpiadada qola medal alǵannan bergi eń joǵary nátije. Sonymen qatar, Nadejda Morozova 5000 metrde toǵyzynshy, komandalyq iz kesý saiysynda segizinshi oryn ielendi.
Onyń komandalasy Elizaveta Golýbeva da úsh ret úzdik ondyqqa endi. Ol 1500 metrde jetinshi, 3000 metrde onynshy oryn aldy. Golýbeva jáne Morozovamen birge komandalyq iz kesý saiysynda Arina Iliashenko da segizinshi nátije kórsetti.
Konkimen júgirýshi Evgenii Koshkin 500 metr qashyqta toǵyzynshy orynǵa turaqtady.
Short-trekshi Denis Nikisha 500 metr qashyqta jetinshi oryn alyp, jekelei saiystaǵy óziniń eń joǵary nátijesine qol jetkizdi.
Fristail-akrobatikadan aralas komandalyq básekede Qazaqstan quramasy jetinshi boldy. Bul synda Asylhan Asan, Roman Ivanov jáne Aiana Joldas óner kórsetti. Aita keteiik, erler arasynda Roman Ivanov 13-oryn alyp, ulttyq qurama tarihyndaǵy úzdik nátijeni jańartty.
Mogýlshy Anastasiia Gorodko da úzdik ondyqqa endi. Ol paralleldi mogýlda shirek finalǵa deiin jetip, segizinshi oryn aldy. Osy distsiplinada Pavel Kolmakov toǵyzynshy satyǵa jaiǵasty.
Mánerlep syrǵanaýdan áielder arasynda Sofia Samodelkina Qazaqstan tarihynda eń joǵary nátijeni tirkedi. Qysqa jáne erkin baǵdarlamanyń qorytyndysy boiynsha ol onynshy orynǵa turaqtady.
Aita keteiik, Milan-Kortina 2026 Olimpiadasynda Qazaqstan atynan 36 sportshy 10 sport túrinen synǵa tústi.
