SQO ákimdiginde qurylys salasyndaǵy jobalarǵa arnalǵan invest týr onlain ótti. Óńir basshysynyń orynbasary Sátjan Ablaliev ár salaǵa toqtalyp, qolǵa alynǵan jobalardy tanystyrdy. Sonyń ishinde sýmen qamtý da bar.
– Prezidenttiń tapsyrmasyna sáikes eldi mekender 2026 jylǵa deiin 100%-ǵa ortalyqtandyrylǵan sý jelisine qosylýy tiis. Muny júzege asyrý maqsatynda jyl saiyn birneshe joba júzege asyrylyp keledi. Nátijesinde 2017-2021 jyldar aralyǵynda 915 km sý qubyry tóselip, 10 myńǵa jýyq halqy bar 31 eldi mekenge taza sý jetti.
Budan basqa 154 myńǵa jýyq turǵyny bar 183 aýyldy sýmen qamtý júiesi jaqsardy. 6,5 myń baspanaǵa sý úige kirgizildi. Al tozyǵy jetken qubyrlardyń kórsetkishi 54,5 %-dan 42,3% deiin tómendetildi, – dedi Sátjan Ablaliev.
Biyl da óńirde eldi mekenderdi sýmen qamtýǵa arnalǵan jumystar jalǵasty. Osy maqsatqa jyl sońyna deiin 12,3 mlrd teńge jumsalady. Tiisti jumystar 55 eldi mekende júrgizilip jatyr.
– 22 aýyldyń 14 myń turǵyny jyl sońyna deiin oń ózgeristi sezinedi. Qalǵanynda keler jyly jańǵyrtý aiaqtalady. Qazirgi ýaqytta 240 myń turǵyny bar 409 eldi meken ortalyqtandyrylǵan sý jelisine qosylǵan. Bul aýyl halqynyń 84%. Áli 46 myń adam turatyn 226 aýyldy qosý qajet.
Keler jylǵa oblysty sýmen qamtýǵa 12,5 mlrd teńge jumsalmaq. Nátijesinde ortalyqtandyrylǵan sý jelisine qosylǵan aýyldardyń sany taǵy 4 % ulǵaiady, – dedi SQO ákiminiń orynbasary.
Buǵan deiin SQO Vinogradovka eldi mekeni turǵyndarynyń batpaqqa ainala bastaǵan kólden sý iship otyrǵanyn aitqan edik. Aýyl halqy taza sýdyń kelýin 15 jyldan artyq úmit úzbei kútip keledi.
