سقو اكىمدىگىندە قۇرىلىس سالاسىنداعى جوبالارعا ارنالعان ينۆەست تۋر ونلاين ءوتتى. ءوڭىر باسشىسىنىڭ ورىنباسارى ءساتجان ابلالييەۆ ءار سالاعا توقتالىپ، قولعا الىنعان جوبالاردى تانىستىردى. سونىڭ ىشىندە سۋمەن قامتۋ دا بار.
– پرەزيدەنتتىڭ تاپسىرماسىنا سايكەس ەلدى مەكەندەر 2026 جىلعا دەيىن 100%-عا ورتالىقتاندىرىلعان سۋ جەلىسىنە قوسىلۋى ءتيىس. مۇنى جۇزەگە اسىرۋ ماقساتىندا جىل سايىن بىرنەشە جوبا جۇزەگە اسىرىلىپ كەلەدى. ناتيجەسىندە 2017-2021 جىلدار ارالىعىندا 915 كم سۋ قۇبىرى توسەلىپ، 10 مىڭعا جۋىق حالقى بار 31 ەلدى مەكەنگە تازا سۋ جەتتى.
بۇدان باسقا 154 مىڭعا جۋىق تۇرعىنى بار 183 اۋىلدى سۋمەن قامتۋ جۇيەسى جاقساردى. 6،5 مىڭ باسپاناعا سۋ ۇيگە كىرگىزىلدى. ال توزىعى جەتكەن قۇبىرلاردىڭ كورسەتكىشى 54،5 %-دان 42،3% دەيىن تومەندەتىلدى، – دەدى ءساتجان ابلالييەۆ.
بيىل دا وڭىردە ەلدى مەكەندەردى سۋمەن قامتۋعا ارنالعان جۇمىستار جالعاستى. وسى ماقساتقا جىل سوڭىنا دەيىن 12،3 ملرد تەڭگە جۇمسالادى. ءتيىستى جۇمىستار 55 ەلدى مەكەندە جۇرگىزىلىپ جاتىر.
– 22 اۋىلدىڭ 14 مىڭ تۇرعىنى جىل سوڭىنا دەيىن وڭ وزگەرىستى سەزىنەدى. قالعانىندا كەلەر جىلى جاڭعىرتۋ اياقتالادى. قازىرگى ۋاقىتتا 240 مىڭ تۇرعىنى بار 409 ەلدى مەكەن ورتالىقتاندىرىلعان سۋ جەلىسىنە قوسىلعان. بۇل اۋىل حالقىنىڭ 84%. ءالى 46 مىڭ ادام تۇراتىن 226 اۋىلدى قوسۋ قاجەت.
كەلەر جىلعا وبلىستى سۋمەن قامتۋعا 12،5 ملرد تەڭگە جۇمسالماق. ناتيجەسىندە ورتالىقتاندىرىلعان سۋ جەلىسىنە قوسىلعان اۋىلداردىڭ سانى تاعى 4 % ۇلعايادى، – دەدى سقو اكىمىنىڭ ورىنباسارى.
بۇعان دەيىن سقو ۆينوگرادوۆكا ەلدى مەكەنى تۇرعىندارىنىڭ باتپاققا اينالا باستاعان كولدەن سۋ ءىشىپ وتىرعانىن ايتقان ەدىك. اۋىل حالقى تازا سۋدىڭ كەلۋىن 15 جىلدان ارتىق ءۇمىت ۇزبەي كۇتىپ كەلەدى.
