2025 jyly Esik kólinde bógettiń aýqymdy rekonstrýktsiiasy bastalady, dep habarlaidy Dalanews.kz
Jobaǵa 23,6 milliard teńge kóleminde jeke investitsiia tartyldy. Joba gidrotehnikalyq qurylymnyń qaýipsizdigin arttyrýmen qatar, óńirdiń týristik infraqurylymyn damytýǵa baǵyttalǵan. Qurylys jumystary barysynda 180 jańa jumys orny ashylady.
Rekonstrýktsiia 2025-2026 jyldarǵa josparlanǵan. Osy kezeńde bógetti keshendi saraptamadan ótkizý, jobalyq qujattamany ázirleý jáne qalpyna keltirý jumystaryn bastaý kózdelgen. Barlyq jumystar Qazaqstan Respýblikasynyń zańnamasynda bekitilgen qaýipsizdik normalaryna sáikes júrgiziledi.
“Habel” JShS-niń bas direktory jobanyń aimaq úshin ǵana emes, búkil el úshin mańyzdylyǵyn atap ótti:
“Esik – biz úshin jai ǵana kól emes, ómirimizdiń máni. Bizdiń maqsatymyz – Esik kólin búkil Qazaqstannyń kórnekti ornyna ainaldyrý. Tabiǵatqa, jan-janýarlar men ósimdikter álemine, jalpy biosferaǵa uqypty jáne sanaly kózqaras – bizdiń negizgi ustanymymyz.”
Rekonstrýktsiianyń alǵashqy kezeńi bes jylǵa josparlanǵan jáne kelesi jumystardy qamtidy:
- Bógetti nyǵaitý jáne onyń senimdiligin arttyrý;
- Týristik infraqurylymdy damytý – jyljymaly tamaqtaný oryndaryn ornalastyrý, bailanys munaralaryn ornatý, modýldik úiler salý.
Barlyq jumystar memlekettik organdardyń qatań baqylaýymen júzege asyrylady. Qurylys jáne paidalaný standarttarynyń saqtalýyn ýákiletti organdar qadaǵalaidy. Sonymen qatar, jeke investor tartatyn merdigerlik uiymdar qurylys jáne bógetterdi paidalaný salasyndaǵy zańnamalyq talaptarǵa sáikes bolýy tiis.
Esik kólindegi bógetti rekonstrýktsiialaý – gidrotehnikalyq qurylystyń qaýipsizdigin qamtamasyz etýmen qatar, týristik salany damytý úshin de mańyzdy qadam. Joba nysannyń senimdiligin arttyryp qana qoimai, óńirge týristerdi tartýdyń jańa múmkindikterin ashady. Jańartylǵan infraqurylym aimaqtyń tartymdylyǵyn arttyryp, onyń ekonomikalyq ósimine serpin beredi.
