2025 جىلى ەسىك كولىندە بوگەتتىڭ اۋقىمدى رەكونسترۋكسياسى باستالادى، دەپ حابارلايدى Dalanews.kz
جوباعا 23،6 ميلليارد تەڭگە كولەمىندە جەكە ينۆەستيسيا تارتىلدى. جوبا گيدروتەحنيكالىق قۇرىلىمنىڭ قاۋىپسىزدىگىن ارتتىرۋمەن قاتار، ءوڭىردىڭ تۋريستىك ينفراقۇرىلىمىن دامىتۋعا باعىتتالعان. قۇرىلىس جۇمىستارى بارىسىندا 180 جاڭا جۇمىس ورنى اشىلادى.
رەكونسترۋكسيا 2025-2026 جىلدارعا جوسپارلانعان. وسى كەزەڭدە بوگەتتى كەشەندى ساراپتامادان وتكىزۋ، جوبالىق قۇجاتتامانى ازىرلەۋ جانە قالپىنا كەلتىرۋ جۇمىستارىن باستاۋ كوزدەلگەن. بارلىق جۇمىستار قازاقستان رەسپۋبليكاسىنىڭ زاڭناماسىندا بەكىتىلگەن قاۋىپسىزدىك نورمالارىنا سايكەس جۇرگىزىلەدى.
“حابەل” ءجشس-نىڭ باس ديرەكتورى جوبانىڭ ايماق ءۇشىن عانا ەمەس، بۇكىل ەل ءۇشىن ماڭىزدىلىعىن اتاپ ءوتتى:
“ەسىك – ءبىز ءۇشىن جاي عانا كول ەمەس، ءومىرىمىزدىڭ ءمانى. ءبىزدىڭ ماقساتىمىز – ەسىك كولىن بۇكىل قازاقستاننىڭ كورنەكتى ورنىنا اينالدىرۋ. تابيعاتقا، جان-جانۋارلار مەن وسىمدىكتەر الەمىنە، جالپى بيوسفەراعا ۇقىپتى جانە سانالى كوزقاراس – ءبىزدىڭ نەگىزگى ۇستانىمىمىز.”
رەكونسترۋكسيانىڭ العاشقى كەزەڭى بەس جىلعا جوسپارلانعان جانە كەلەسى جۇمىستاردى قامتيدى:
- بوگەتتى نىعايتۋ جانە ونىڭ سەنىمدىلىگىن ارتتىرۋ؛
- تۋريستىك ينفراقۇرىلىمدى دامىتۋ – جىلجىمالى تاماقتانۋ ورىندارىن ورنالاستىرۋ، بايلانىس مۇنارالارىن ورناتۋ، مودۋلدىك ۇيلەر سالۋ.
بارلىق جۇمىستار مەملەكەتتىك ورگانداردىڭ قاتاڭ باقىلاۋىمەن جۇزەگە اسىرىلادى. قۇرىلىس جانە پايدالانۋ ستاندارتتارىنىڭ ساقتالۋىن ۋاكىلەتتى ورگاندار قاداعالايدى. سونىمەن قاتار، جەكە ينۆەستور تارتاتىن مەردىگەرلىك ۇيىمدار قۇرىلىس جانە بوگەتتەردى پايدالانۋ سالاسىنداعى زاڭنامالىق تالاپتارعا سايكەس بولۋى ءتيىس.
ەسىك كولىندەگى بوگەتتى رەكونسترۋكسيالاۋ – گيدروتەحنيكالىق قۇرىلىستىڭ قاۋىپسىزدىگىن قامتاماسىز ەتۋمەن قاتار، تۋريستىك سالانى دامىتۋ ءۇشىن دە ماڭىزدى قادام. جوبا نىساننىڭ سەنىمدىلىگىن ارتتىرىپ قانا قويماي، وڭىرگە تۋريستەردى تارتۋدىڭ جاڭا مۇمكىندىكتەرىن اشادى. جاڭارتىلعان ينفراقۇرىلىم ايماقتىڭ تارتىمدىلىعىن ارتتىرىپ، ونىڭ ەكونوميكالىق وسىمىنە سەرپىن بەرەدى.
