Qazirgi ýaqytta oblysta aýyz sýdy tutyný kólemi 162 myń m3 quraidy. Al tapshylyq ásirese jazǵy kezeńde qatty seziledi, qajettilik táýligine 77 myń tekshe metr.
Sondyqtan qazirgi ýaqyttan bastap sý tapshylyǵyn joiýǵa bailanysty jobalar kezeń-kezeńimen júzege asyrylýda.
Máselen, «Qarajanbas» ken ornynda qýattylyǵy táýligine 17 myń tekshe metrdi quraityn sý tushytý zaýyty iske qosylǵan.
Buǵan deiin kásiporyn «Astrahan-Mańǵyshlaq» qubyrynan sý alyp kelgen bolatyn. Nátijesinde «Astrahan-Mańǵystaý» sý qubyrynan bosaǵan 10 myń tekshe metr aýyz sý Jańaózen qalasy, Beineý, Jetibai aýyldary turǵyndarynyń igiligine paidalanylýda.
Sý tapshylyǵyn joiý maqsatynda júzege asyp jatqan taǵy bir shara «Kaspii» sý tushytý zaýytynyń qýatyn eki esege ulǵaitý arqyly táýligine 40 myń tekshe metrge deiin jetkizý josparlanýda.
2022 jyldyń jazǵy maýsymynda qýattylyǵy 5 myń tekshe metr tushytý qondyrǵysy paidalanýǵa berildi. Al qalǵan jumystar 2023 jyldyń sońyna deiin aiaqtalady.
– Aqtaýda jeke investordyń esebinen táýligine 20 myń tekshe metr sý tushytý qondyrǵysynyń qurylysy júrgizilýde. Jyl sońyna deiin 10 myń tekshe metr sý alýdy josparlanǵan. Memleket basshysy alǵa qoiǵan tapsyrmasy aiasynda 12 aýyldy ortalyqtandyrylǵan sýmen jabdyqtaý jónindegi mindeti búginde tolyq oryndaldy. Nátijesinde eldimekenderde halyqtyń aýyz sýǵa qoljetimdiligi 96%-dan 100%-ǵa deiin jetti, – dedi Mańǵystaý oblysynyń ákimi Nurlan Noǵaev Ortalyq kommýnikatsiialar qyzmetinde ótken baspasóz máslihatynda.
Budan bólek biyl F.Shevchenko qalasynda táýligine 5 myń tekshe metr, «MAEK» aýmaǵynda 24 myń tekshe metr jáne Kendirli aimaǵynda 50 myń tekshe metr sý tushytý qondyrǵylaryn salý jumystary bastalady.
«MAEK» energiia jáne sý óndirý keshenin jańǵyrtý boiynsha qabyldanyp jatqan sharalarǵa jeke toqtap ótken jón.
– Prezident Úkimetke oblys ortalyǵyndaǵy injenerlik jelilerdi qaita qurýǵa qajetti qarajat bólýdi tapsyrdy. Óńirdegi sý tapshylyǵy máselesin sheshýdiń biri «MAEK» keshenin ákimdiktiń kommýnaldyq menshigine ótkizý bolyp tabylady. Kásiporyndy kommýnaldyq menshikke berýdiń arqasynda bizde kásiporyndy jańǵyrtý baǵdarlamasyn ázirleý múmkindigi paida boldy.
Jergilikti atqarýshy organnyń rezervinen elektr stantsiiasynyń tozǵan jabdyqtaryn, tushytý qondyrǵylarynyń sorǵy jabdyqtaryn jáne DOÝ úshin jylý almastyrǵysh tútikterdi aýystyrýǵa 2,6 mlrd teńge mólsherinde qarajat bólindi. Sondai-aq, elektr stantsiialary men MAEK sý tushytý kesheni jabdyqtarynyń senimdi jumysyn qamtamasyz etý úshin respýblikalyq biýdjetten jabdyqtar men jiyntyq quraldar satyp alýǵa 4,9 mlrd teńge kóleminde qarajat bólýge ótinim joldandy, – dedi Nurlan Noǵaev.
