Máskeýde ótken «Qazaqstan – múmkindikter vektory» iskerlik dıalogy barysynda QR-nyń ınvestısıalyq áleýeti talqylandy. İs-sharada eki eldiń saıası jáne iskerlik qoǵamdastyqtarynyń ókilderi sóz sóıledi.
QR RF-daǵy elshisi Dáýren Abaev jahandyq ahýalǵa qaramastan, memleketterdiń ekonomıkalyq yntymaqtastyǵy damýdyń jańa kezeńin ótkerip jatqanyn aıtty. Sońǵy 18 jylda Qazaqstan EAEO elderi arasynda reseılik ınvestısıalardy tartý kólemi boıynsha kóshbasshy boldy – bul kórsetkish $20 mlrd-tan asty.
«Reseı, árıne, Qazaqstandaǵy sheteldik kapıtalmen jumys isteıtin kásiporyndar sany boıynsha kóshbasshy. Búginde elimizde Reseıdiń qatysýymen 28 myńnan astam kompanıa jumys isteıdi, olardyń 4 myńǵa jýyǵy ótken jyly ashyldy. Mundaı serpinge ónerkásiptik kooperasıanyń arqasynda qol jetkizildi», – dedi dıplomat.
İskerlik kezdesýge qatysýshylar Qazaqstan men Reseıdiń birlesken jobalaryn, sondaı-aq olardy júzege asyrýdyń ekonomıkalyq jáne áleýmettik áserin talqylady.
«Birlesken jobalardyń jalpy sany shamamen 135. Olardyń jalpy quny $26,2 mlrd-tan asady. Bul jobalardyń arqasynda 28 myń jumys orny ashylady», - dedi «Kazakh Invest» UK» AQ Basqarma tóraǵasy Erjan Elekeev.
Onyń aıtýynsha, qazirgi ýaqytta mashına jasaý, metalýrgıa jáne hımıa ónerkásibi salasynda yntymaqtastyq erekshe qarqynmen damyp jatyr. Buǵan memleket tarapynan eldegi ınvestısıalyq ahýaldy jaqsartý maqsatynda buryn qabyldanǵan sharalar yqpal etken.
Eń mańyzdy jobalarǵa sholý jasaǵan Elekeev Qaraǵandy oblysynda «Tatneft» kompanıasymen $274 mln-ǵa avtomobıl shınalaryn óndirý, Qostanaı oblysynda Kamlitkz kompanıasymen $485 mln-ǵa júk kólikteri úshin shoıyn quıý komponentterin óndirý, Túrkistan oblysynda $1,7 mlrd-qa jylyjaı qyzanaqtaryn ósirý jáne Jambyl oblysynda «EvroHım» kompanıasymen $1 mlrd-qa mıneraldy tyńaıtqysh óndiretin jobalaryn atap ótti.
Aıta ketý kerek, sońǵy eki ınvestısıalyq joba QR AÓK-niń jalpy ónim men aýyl sharýashylyǵy ónimderiniń eksportyn 2028 jylǵa deıin eki esege arttyrý josparyn júzege asyrýda strategıalyq mańyzǵa ıe.
«Qazaqstan ekonomıkasy úlken áleýetke ıe. Sarapshylardyń baǵalaýynsha, búginde eldegi egistik jerlerdiń 30%-y ǵana tyńaıtylady. Bul saladaǵy jaǵdaıdy ózgertý astyq túsimin 10%-ǵa arttyrýǵa múmkindik beredi, al ol respýblıka kóleminde orasan zor kórsetkish», – dedi «EvroHım» tobynyń prezıdenti Oleg Shıráev
Jambyl oblysyndaǵy jańa zaýyttyń mıneraldy tyńaıtqyshtary men ındýstrıalyq ónimderiniń jyldyq kólemi 1 mln tonnadan asady dep kútilip otyr.
