Pavlodar turǵyny Marina Harchýk 18 jylǵa jýyq áleýmettik baspana kezeginde turyp, eki bólmeli páter beriletini týraly habarlama alǵan. Alaida kópten kútken baspanasyna qol jetkize almaǵan. Júie otbasynyń tabysy belgilengen mólsherden asyp ketkenin kórsetip, páter berýden bas tartqan, dep habarlaidy dalanews.kz.
27 jastaǵy Marina – tul jetim. Ol áleýmettik turǵyn úi kezegine 2008 jyly tirkelgen. Biyl 6 tamyzda oǵan 1414 nómirinen aýdany 81 sharshy metr bolatyn eki bólmeli páter bólingeni týraly SMS kelgen.
Qýanyshty habardy alǵan Marina baspanany alýǵa kelisimin rastap, qajetti rásimderden ótken. Alaida júiede «Jalǵastyrý» batyrmasyn basqannan keiin otbasynyń tabysy talapqa sáikes kelmeitini týraly habarlama shyǵyp, ótinimi qabyldanbaǵan.
"Men 2008 jyldan beri, iaǵni 18 jylǵa jýyq ýaqyt baspana kezeginde turmyn. 6 tamyzda 1414-ten maǵan 81 sharshy metrlik eki bólmeli páter berilgeni týraly habarlama keldi. Men ony rastadym, qajetti rásimderden óttim. Biraq ary qarai jalǵastyrǵan kezde tabysymyz talapqa sáikes kelmeidi degen sebeppen bas tartyldy", – deidi Marina.
Qazir ol turmysta, otbasynda kishkentai qyzy bar. Úsh adamnan turatyn otbasynyń jeke baspanasy joq, sondyqtan páter jaldap turady. Marinanyń ai saiynǵy tabysy shamamen 300 myń teńge, jubaiy da osy kólemde jalaqy alady.
Onyń sózinshe, "Otbasy bankiniń" mamandary erli-zaiyptynyń jiyntyq tabysy belgilengen shekten asyp ketkenin túsindirgen. Marinaǵa úsh adamnan turatyn otbasy úshin tabys shegi shamamen 350 myń teńge ekeni aitylǵan.
"Nelikten turaqty ári resmi tabystyń bolýy baspana alýǵa kedergi bolýy kerek? Biz páter jaldap turamyz. Balabaqshaǵa, azyq-túlikke, kiim-keshekke, kúndelikti turmystyq qajettilikterge aqsha jumsaimyz. Oǵan qosa nesielik mindettemelerimiz bar", - deidi ol.
Marina taǵy bir máseleniń jaýabyn tappai otyrǵanyn aitady. Eger otbasynyń tabysy bastapqyda talapqa sáikes kelmese, nelikten júie oǵan páter bólingeni týraly habarlama jibergen?
"Eger tabysymyz talapqa sáikes kelmese, nege maǵan aldymen páter bólingeni týraly habarlama keldi? Nege men ony rastaǵannan keiin ǵana bas tartyldy? Men jetim balalar sanaty boiynsha kezekte turmyn. Osy sanatqa qatysty tabys qandai talaptar negizinde eseptelgenin túsindirip berýdi suraimyn", – deidi pavlodarlyq.
Ol qabyldanǵan sheshimdi qaita qaraý múmkindigin de surap otyr. Sondai-aq keiin satyp alý quqyǵymen beriletin jaldamaly baspana alý múmkindigi qarastyryla ma degen saýal qoiǵan.
Marina bul máseleni sheshýge kómektesýdi surap, Prezident Qasym-Jomart Toqaevqa da júgingen.
"Men úshin bul páter – jai ǵana sharshy metr emes, 18 jylǵa jýyq kútkenimniń nátijesi", - deidi Marina.
Pavlodar turǵyny endi uzaq jyl boiy kezekte turǵanyn jáne óziniń tul jetimder sanatyna jatatynyn eskerip, jaǵdaiyna jeke nazar aýdarylyp, baspana máselesiniń sheshilýine kómektesýdi surap otyr.
