Kassatsiialyq sot Nazira Gold qarjy piramidasyn uiymdastyrýshyǵa qatysty úkimdi ózgerissiz qaldyrdy, dep habarlaidy dalanews.kz.
Qylmystyq ister jónindegi kassatsiialyq sot asa iri mólsherde alaiaqtyq jasaǵany, qarjy (investitsiialyq) piramidasyn qurǵan jáne oǵan basshylyq etkeni, sondai-aq, qylmystyq jolmen kelgen múlikti zańdastyrǵany úshin sottalǵan Nazira Gold qarjy piramidasyn uiymdastyrýshyǵa qatysty qylmystyq isti qarady.
Sottardyń anyqtaýynsha, 2024 jylǵy mamyrdan 2025 jylǵy aqpanǵa deiin joǵary tabysqa kenelýge ýáde berý arqyly azamattardan 1,2 mlrd teńgeden asa qarajat tartylǵan.
Tergeý jáne sot barysynda bul qarajat qymbat kólikter, jyljymaityn múlik pen zergerlik buiymdar satyp alýǵa jumsalǵany anyqtalǵan. Múliktiń qylmystyq jolmen alynǵanyn jasyrý maqsatynda ol munyń bárin týystary men ózge adamdardyń atyna rásimdegen.
Sot úkimimen memleket kirisine 392,9 mln teńge qolma-qol aqsha, quny 896,3 mln teńge bolatyn 17,8 keli altynnan jasalǵan zergerlik buiymdar, 186,9 gramm kúmis zergerlik buiymdar, sondai-aq, 52 kólik, turǵyn úiler, páterler jáne kommertsiialyq maqsattaǵy jyljymaityn múlik tárkilendi.
Sot aktisinde 151 jábirlenýshi kórsetilgen. Onyń ishinde 76 jábirlenýshiniń paidasyna materialdyq zalal óndirildi, 12 jábirlenýshiniń azamattyq talap qoiý quqyǵy tanylyp, zalal mólsherin aiqyndaý máselesi azamattyq sot isin júrgizý tártibimen qaraýǵa berildi. Taǵy 63 jábirlenýshige tiisti talappen azamattyq sotqa júginý quqyǵy túsindirilgen.
Sottalǵanǵa azamattardyń qarajatyn jáne investitsiialardy tartýǵa bailanysty qyzmetpen ainalysý quqyǵynan 7 jylǵa aiyra otyryp, múlkin tárkileý jáne 10 jyl merzimge bas bostandyǵynan aiyrý jazasy taǵaiyndaldy. Kámeletke tolmaǵan balasy bolýyna bailanysty jazany óteý bir jylǵa keiinge qaldyryldy.
Kassatsiialyq sot onyń kinási is boiynsha tolyq dáleldengen, qylmystyq zań durys qoldanylǵan degen, al taǵaiyndalǵan jaza jasalǵan qylmystardyń aýyrlyǵyna sai keletini týraly qorytyndyǵa keldi. Osylaisha sot aktileri ózgerissiz qaldyryldy.
