Qazaqstanda vaýcherlik qarjylandyrýdy engizý balabaqsha kezeginiń qysqarýyna áser etti, dep habarlaidy dalanews.kz.
Oqý-aǵartý ministrligi Memleket basshysynyń tapsyrmasy boiynsha memlekettik qyzmetter kórsetý jáne memlekettik bilim berý tapsyrysyn ornalastyrýdyń jańa mehanizmin ázirlegen.
Buǵan deiin balabaqsha oryndaryna kezek vertikaldy qaǵidat boiynsha qalyptasyp, memlekettik tapsyrys naqty mektepke deiingi uiymdarǵa bekitiletin. Al qarjylandyrý naqty qajettilikke qarai bólinbegen. Ministrlik mundai tásil jalǵan kontingentti tirkeý, balabaqshalar arasyndaǵy básekelestiktiń shektelýi jáne biýdjet qarajatynyń tiimsiz paidalanylýy siiaqty máselelerge ákelgenin atap ótti.
Jańa mehanizm aiasynda derekterdiń durystyǵyn tekserip, yqtimal buzýshylyqtardy anyqtaityn táýekelderdi basqarý júiesi engizildi. Bul memlekettik bilim berý tapsyrysyn bólýdiń obektivtiligin arttyryp, sybailas jemqorlyq táýekelderin tómendetýge baǵyttalǵan.
Qazirgi ýaqytta vaýcherlik qarjylandyrý boiynsha pilottyq joba elimizdiń 20 qalasy men 23 aýdanynda júzege asyrylyp jatyr. Oǵan shamamen 6 myń mektepke deiingi uiym qatysady. Joba aiasynda 1 mln-nan astam vaýcher berilgen.
Ministrliktiń málimetinshe, jańa mehanizmdi engizý nátijesinde mektepke deiingi tárbiemen qamtylǵan balalar sany artqan. Sonymen qatar 2-6 jastaǵy kezekte turǵan balalar sany 160 myńnan 23 myńǵa deiin qysqarǵan.
Pilottyq joba aiasynda 35 mlrd teńgeden astam biýdjet qarajaty únemdelgen. Únemdelgen qarajat esebinen qosymsha vaýcherler berilip jatyr.
Ministrlik jańa model memlekettik qyzmetterdiń ashyqtyǵyn qamtamasyz etýge, biýdjet qarajatyn tiimdi paidalanýǵa, sondai-aq bilim berý qyzmetteriniń sapasy men mektepke deiingi uiymdar arasyndaǵy básekelestikti arttyrýǵa múmkindik beretinin habarlady.
