Búgin, 15 qyrkúiekte, Qazaqstan Qarýly kúshterinde tank áskerleri kúni atalyp ótýde. Bul – qyzmeti brondy-tank tehnikasymen bailanysty áskeri qyzmetshiler men ardagerlerdiń kásibi merekesi, dep habarlaidy dalanews.kz.
Ataýly kún tarihi oqiǵamen bailanysty. 1942 jylǵy 15 qyrkúiekte Shymkent temirjolynyń jas eńbekshileri maidanǵa «Qazaqstan komsomoldary» degen jazýy bar 46 T-34 tankin tapsyrǵan. Tank kolonnasyn jasaqtaýǵa arnalǵan qarajat jinaýǵa respýblika jastarynyń barlyǵy atsalysty.
Búginde tankter jalpyáskeri urystyń mańyzdy elementteriniń biri bolyp qala beredi. Sonymen qatar ushqyshsyz ushý apparattarynyń, joǵary dáldiktegi qarýdyń jáne zamanaýi barlaý quraldarynyń keńinen qoldanylýy brondy tehnikany paidalanýǵa degen tásilderdi ózgertti. Onyń tiimdiligi kóbine jalpyáskeri top quramyndaǵy barlaý, atys jáne manevrlik quraldarmen ózara is-qimylǵa bailanysty.
Qazaqstan Qarýly kúshteriniń brondy tehnikasyna tehnikalyq qyzmet kórsetý jáne kúrdeli jóndeý jumystaryn «Semei injiniring» AQ júzege asyrady. Ortalyq Aziiadaǵy osy baǵyttaǵy jalǵyz kásiporyn armiia qarý-jaraǵyndaǵy brondy tehnikanyń barlyq túrine kúrdeli jóndeý júrgizýdiń tolyq tehnikalyq jáne tehnologiialyq tsiklin qamtamasyz etedi.
Qarýly kúshterde tankisterdi daiarlaýǵa erekshe kóńil bólinedi. Ekipajdyń úilesimdi is-qimyly, jaýyngerlik mashinany kásibi basqarý jáne qoiylǵan mindetterdi dál oryndaý daǵdylary sabaqtar, oqý-jattyǵýlar men áskeri manevrler barysynda pysyqtalady.
Tank bólimshelerine ofitserler daiarlaýdy Almatydaǵy Qurlyq áskerleriniń áskeri institýty júzege asyrady. Al kishi mamandar Garnizonnyń oqý ortalyǵynda daiarlyqtan ótip, qajetti kásibi bilim men praktikalyq daǵdylardy meńgeredi.
Tankisterdiń qazirgi zamanǵy daiarlyǵy aldyńǵy býyndardyń tájiribesin jańa taktikalyq tásildermen jáne brondy tehnikany qoldaný ádisterimen ushtastyrady. Áskeri qyzmetshiler zamanaýi urys alańynyń talaptaryn eskere otyryp, atys júrgizý, jaýyngerlik mashinalardy basqarý jáne bólimshe quramynda is-qimyl jasaý daǵdylaryn jetildirýde.
