Májilis depýtaty Murat Ábenov Qazaqstandaǵy áleýmettik jáne qarjylyq máselelerge qatysty ótkir málimdeme jasap, júiedegi olqylyqtardy ashyq aitty, dep habarlaidy Dala News.
Onyń aitýynsha, elde eńbek quqyqtary saqtalmai, keibir azamattar múlde qorǵansyz qalyp otyr.
«Keshki saǵat segizden keiingi jumys eki ese tólenýi kerek. Al taksister múlde qujatsyz jumys isteidi, tólem joq, saqtandyrý joq. Endi olardyń quqyqtaryn qalpyna keltirýimiz kerek», - dedi depýtat.
Depýtat budan bólek bankter men notariýstardyń áreketterine bailanysty kúrdeli máseleni kóterdi. Onyń sózinshe, milliondaǵan adamnyń shoty buǵattalyp, olar qalypty ómir súrý múmkindiginen aiyrylǵan.
«Bir jarym million adamnyń shoty buǵattalǵan. Bankter alaiaqtyq nesielerdi tipti alýǵa bolmaityn adamdarǵa rásimdegen. Aýrý adamdarǵa, zeinetkerlerge, tabysy az azamattarǵa bergen. Odan keiin notariýstar sotsyz-aq adamdy qaryz dep tanidy. Adamdy shaqyrmai-aq sheshim shyǵarady. Sonyń saldarynan 900 myń adamnyń shoty buǵattalyp, shetelge shyǵýyna tyiym salynǵan. Adamdar jumys istei almaidy, tamaq ta, dári de ala almai otyr», dep dabyl qaqty Abenov.
Osy jaǵdaidy eskere otyryp, Ábenov máseleni sheshýdiń naqty jolyn usyndy. Onyń aitýynsha, azamattardyń jalaqysyna tolyq shekteý qoiýǵa bolmaidy.
«Eger adamnyń qaryzy bolsa, jalaqysynyń 50 paiyzy ustalyp qalýy múmkin. Biraq qalǵan bóligin azamatqa mindetti túrde qolma-qol berý qajet», - dep usyndy óz sózinde depýtat.
Depýtat qazirgi júiede adamdar jalaqysyn ala almai, jumysqa da ornalasa almai otyrǵanyn atap ótti.
«Notariýstar qazir 1,5 mln adamnyń shottaryn sotsyz buǵattap tastaǵan. Eshqandai jumys isteýge múmkindik joq. Ne ailyq ala almaidy, ne tamaq ishe almaidy. Shot bolmaǵannan keiin jumysqa da qabyldamaidy»,- dep qorytyndylady.
Ábenovtiń aitýynsha, bul másele Ulttyq bankpen talqylanǵan jáne Eńbek kodeksine ózgeris engizý usynylyp otyr.
