ءماجىلىس دەپۋتاتى مۇرات ابەنوۆ قازاقستانداعى الەۋمەتتىك جانە قارجىلىق ماسەلەلەرگە قاتىستى وتكىر مالىمدەمە جاساپ، جۇيەدەگى ولقىلىقتاردى اشىق ايتتى، دەپ حابارلايدى Dala News.
ونىڭ ايتۋىنشا، ەلدە ەڭبەك قۇقىقتارى ساقتالماي، كەيبىر ازاماتتار مۇلدە قورعانسىز قالىپ وتىر.
«كەشكى ساعات سەگىزدەن كەيىنگى جۇمىس ەكى ەسە تولەنۋى كەرەك. ال تاكسيستەر مۇلدە قۇجاتسىز جۇمىس ىستەيدى، تولەم جوق، ساقتاندىرۋ جوق. ەندى ولاردىڭ قۇقىقتارىن قالپىنا كەلتىرۋىمىز كەرەك»، - دەدى دەپۋتات.
دەپۋتات بۇدان بولەك بانكتەر مەن نوتاريۋستاردىڭ ارەكەتتەرىنە بايلانىستى كۇردەلى ماسەلەنى كوتەردى. ونىڭ سوزىنشە، ميلليونداعان ادامنىڭ شوتى بۇعاتتالىپ، ولار قالىپتى ءومىر ءسۇرۋ مۇمكىندىگىنەن ايىرىلعان.
«ءبىر جارىم ميلليون ادامنىڭ شوتى بۇعاتتالعان. بانكتەر الاياقتىق نەسيەلەردى ءتىپتى الۋعا بولمايتىن ادامدارعا راسىمدەگەن. اۋرۋ ادامدارعا، زەينەتكەرلەرگە، تابىسى از ازاماتتارعا بەرگەن. ودان كەيىن نوتاريۋستار سوتسىز-اق ادامدى قارىز دەپ تانيدى. ادامدى شاقىرماي-اق شەشىم شىعارادى. سونىڭ سالدارىنان 900 مىڭ ادامنىڭ شوتى بۇعاتتالىپ، شەتەلگە شىعۋىنا تىيىم سالىنعان. ادامدار جۇمىس ىستەي المايدى، تاماق تا، ءدارى دە الا الماي وتىر»، دەپ دابىل قاقتى ابەنوۆ.
وسى جاعدايدى ەسكەرە وتىرىپ، ابەنوۆ ماسەلەنى شەشۋدىڭ ناقتى جولىن ۇسىندى. ونىڭ ايتۋىنشا، ازاماتتاردىڭ جالاقىسىنا تولىق شەكتەۋ قويۋعا بولمايدى.
«ەگەر ادامنىڭ قارىزى بولسا، جالاقىسىنىڭ 50 پايىزى ۇستالىپ قالۋى مۇمكىن. ءبىراق قالعان بولىگىن ازاماتقا مىندەتتى تۇردە قولما-قول بەرۋ قاجەت»، - دەپ ۇسىندى ءوز سوزىندە دەپۋتات.
دەپۋتات قازىرگى جۇيەدە ادامدار جالاقىسىن الا الماي، جۇمىسقا دا ورنالاسا الماي وتىرعانىن اتاپ ءوتتى.
«نوتاريۋستار ءقازىر 1،5 ملن ادامنىڭ شوتتارىن سوتسىز بۇعاتتاپ تاستاعان. ەشقانداي جۇمىس ىستەۋگە مۇمكىندىك جوق. نە ايلىق الا المايدى، نە تاماق ىشە المايدى. شوت بولماعاننان كەيىن جۇمىسقا دا قابىلدامايدى»،- دەپ قورىتىندىلادى.
ابەنوۆتىڭ ايتۋىنشا، بۇل ماسەلە ۇلتتىق بانكپەن تالقىلانعان جانە ەڭبەك كودەكسىنە وزگەرىس ەنگىزۋ ۇسىنىلىپ وتىر.
