Vedomstvo basshysy Marat Ahmetjanovtyń málim etkenindei, quzyrly organdar órt qasaqana qoiylǵan degen nusqany da qarastyryp jatyr. Isti zerttep, zerdeleitin arnaiy prokýrorlar toby qurylǵan, oǵan IIM mamandary da engen.
"Tergeý, tekserý jumysyna shamamen 60 kúndei ýaqyt ketedi. Osy aralyqta jai túsý, qasaqana ot qoiý, qyzmetine nemquraily qaraý nusqalaryn elekten ótkizip, soǵan sai sheshim qabyldaimyz", - deidi Ahmetjanov.
Úkimettegi resmi sharadan keiin tilshiler ministrden "Iýrii Ilinniń tótenshe jaǵdai kezindegi is-áreketi tekserile me?" degen saýal qoidy.
Ahmetjanovtyń atap ótkenindei bul másele Toqaevtyń baqylaýynda. Prezident Bas prokýrorǵa tiisti tapsyrma bergen.
"Sonyń aiasynda tekserý júrgiziletin bolady. Órt faktisi – bul tótenshe jaǵdai, adamdar qaza tapty, osy sebepti qylmystyq is aiasynda tekserý bolady. Nelikten kesh qimyldady? Nelikten der kezinde shara qoldanbady? Múmkin beiqamdyq, qyzmettik mindetin oryndamaý...”, – dedi ministr.
8 maýsymda “Semei ormany” aýmaǵynda tutanǵan órt baqylaýdan shyǵyp ketip, azdaǵan kúnniń aralyǵynda 60 myń gektarǵa ulǵaiyp úlgerdi. Abai oblysynyń ortalyǵy Semei qalasynda tótenshe jaǵdai jariialandy.
Órttiń aldyn-alýǵa asyqpai, sylbyr qimyldaǵan Tótenshe jaǵdailar ministri Iýrii Ilin qyzmetinen bosatylǵan bolatyn. Al Abai oblysynyń ákimi óz mindetin durys atqarmaǵany úshin sógis alǵan.
Abai oblysynda arnaiy shtabtyń májilisin ótkizgen Memleket basshysy órtke qatysty uzynsonar baiandama jasaýǵa kirisken Tótenshe jaǵdai vitse-ministri Marat Kúldikovtiń sózin orta joldan bólgen.
«Ilin? Men qyzmetinen bosatqan ministr óziniń tikelei qyzmettik mindetin oryndaýǵa nege múldem nemquraily qaraidy?!
14 adam qaza tapty. Siz osyny túsinesiz be? Men olardyń otbasylarymen kezdestim. Bul azamattar óz otbasynyń perzentteri, otaǵasy bolatyn. Bir otbasynda eki jasar bala jetim qaldy. Adamdardyń artynda nesieleri qaldy. Olar otbasynyń jalǵyz asyraýshysy edi», - degen edi Toqaev.
Aitqandai, Máskeý Abai oblysyndaǵy órtti sóndirý jumystaryna ODKB-ny tartý boiynsha Tasmaǵambetovty jaǵalai bastady.
Tolyǵyraq osy jerde ➡️ https://t.me/dalainside/1357
https://dalanews.kz/T-rmys/90482-zholdy-zhondep-turizmdi-damytamyz-be
